अमेरिका । फिल्मले कति पैसा कमायो यसका आधारमा सफलता असफलता मापन गरिन्छ । हालै रिलिज भएको भारतीय फिल्म ‘जवान’ले तीन दिनमा करिब साढे तीन अर्ब भारु कमाएको छ । यस आधारमा यो फिल्मको वाहवाही भइरहेको छ ।

नेपाललगायत विश्वका विभिन्न देशबाट पनि यो फिल्मले राम्रो कमाइ गरिरहेको छ । छिटो समयमा बढी कमाउने फिल्मको रकेर्ड पनि यसले राखिरहेको छ । आउने दिनमा जवानले गर्ने आम्दानी अरु बढ्ने छ । यो फिल्मले १० अर्ब भारुसम्म कमाउने विश्लेषण गरिएको छ ।

जवानमा के छ ?

साउथ इन्डियनमा देखिने एक्सनको स्वादसहित बलिउड फिल्ममा देखिने विषयलाई घुसाएर जवान निर्माण गरिएको छ । निर्देशक एटलीले एक्सनलाई फिल्मको मुख्य विषय राजनीतिक भष्ट्राचारसँग जोडेर देखाएका छन् । यो नै यस फिल्मको प्रमुख विशेषता हो । एक्सन हेर्न बोर लाग्दै गर्दा राजनीतिक विषय आइपुग्छ यो फिल्मको रमाइलो पक्ष यही हो ।

केही वर्षयता भारतको साउथ फिल्म इन्डष्ट्रीले बलिउडलाई चुनौती दिएको थियो । साउथमा बनेका एक्सन फिल्म धेरैले मन पराउन थालेका थिए । यो यथार्थलाई जवानमा घुसाइएको छ । बलिउडका दर्शकलाई पनि निराश नबनाउने गरी राजनीतिक भष्ट्राचारको कथामा फिल्म आधारित छ । साउथ फिल्मको प्रभाव बलिउडमा परेको जवानमा पनि देख्न सकिन्छ । निर्देशक एटलीले यसलाई राम्रोसँग मिस मास गरेका छन् । जवानको मुख्य विशेषता यही हो ।

‘तपाईं एउटा लामखुट्टे मार्ने धूप किन्दा यो कति घन्टा चल्छ, राम्रोसँग काम गर्छ गर्दैन भनेर सोध्नु हुन्छ तर, पाँच वर्ष चल्ने सरकारका लागि भोट दिँदा कुन व्यक्ति तपाईंका लागि उचित छ त्यो हेर्नु हुन्न समस्या यहाँ छ’, यो भनाइ फिल्मका मुख्य पात्र शाहरुख खानको हो । फिल्मको कथा यही काम नगर्ने राजनीतिक नेताको वरिपरि घुम्छ ।

सामान्य हिन्दी फिल्मभन्दा केही लामो २ घन्टा ४५ मिनेटको यो फिल्ममा शाहरुख खान छाएका छन् । दोहोरो भूमिकामा उनी देखिन्छन् । यो फिल्ममा साउथ फिल्मको प्रभाव मात्र घुसाइएको छैन, पात्रहरु पनि साउथवाट लिइएको छ । नयनतारा, विजय सेतुपति पनि मुख्य भूमिकामा छन् । साउथ फिल्मका चर्चित अभिनेता विजय खलनायकको भूमिकामा जमेका छन् । नयनताराको भूमिका र ग्लामर पनि हेर्नलायक छ । दीपिका पादुकरको भूमिका छोटो भए पनि प्रभावकारी छ ।

एक्सन मन नपराउनेहरुका लागि भने यो फिल्म ठीकै हो । चर्चा चलेजस्तो रहेनछ भन्नेहरु पनि भेटिन्छन् । यो पनि सत्य हो । तर, एक्सन र राजनीतिक भष्ट्राचार मिसमास भएकाले फिल्म हेर्दा छ्या भनिहाल्नु पर्ने छैन ।

सकारात्मक रिभ्यु

जवानलाई निकै सकरात्मक रिम्भु पनि मिल्यो । यसले गर्दा यो फिल्ममा दर्शकहरुको आकर्षण बढ्यो । यही कारण रिलिज भएको दिनदेखि नै फिल्मको कमाई उच्च रह्यो । रटन टम्याटोलगायत भारतका फिल्म समीक्षकहरुले जवानलाई उच्च रेटिङ दिएका छन् ।