ड्यालस (टेक्सस) । अमेरिकाका नेपालीहरुको सबैभन्दा पुरानो संस्था ‘एसोसिएसन अफ नेप्लिज इन दी अमेरिकाज’ (एएनए) को सम्मेलन आउँदो जुलाई महिनामा ड्यालसमा हुने भएको छ । 

आगामी सम्मेलनका बारेमा जानकारी दिन शनिबार आयोजित पत्रकार भेटघाट कार्यक्रममा एएनएका अध्यक्ष विजयराज भट्टराईले अमेरिकामा न्यूयोर्क पछि सबैभन्दा धेरै नेपाली समुदायको बसोबास रहेको ड्यालसमा जुलाई २ र ३ तारिकमा सम्मेलन हुन लागेको जानकारी दिए । ‘पछिल्लो दशकमा ड्यालसमा हाम्रो समुदायका सदस्यहरु ठूलो संख्यामा थपिएका छन् । ड्यालसमा सम्मेलन हुने भएपछि सबैतिरबाट साथीहरुको यहाँ आउने र हेर्ने चाहना पनि बढेको छ’ भट्टराईले सम्मेलनका बारेमा जानकारी दिँदै भने ।

 

३९ वर्ष अघि सन् १९८३ मा एएनएको स्थापना भएको थियो । त्यतिखेर निकै थोरै नेपालीहरु अमेरिकामा थिए । अहिले झण्डै तीनलाखको हाराहारीमा नेपालीहरु अमेरिकामा रहेको चर्चा गरिन्छ । 

एएनए इतिहास रचेको संस्था मात्र नभएर यसका गतिविधिहरु प्रति पनि विगतमा निकै चासो हुने गरेको थियो । केही वर्ष अघि संस्थामा देखिएको विवादले संस्था सेलाएको थियो । तर अहिले यसले पुरानै गति र लय समात्ने प्रयासमा अघि बढिरहेको समेत भट्टराईले उल्लेख गरे । 

 

यस अघि सन् २००५ र २०१२ मा पनि एएनएको सम्मेलन ड्यालसमा भएका थिए । त्यतिखेर भन्दा यसपटक नेपाली समुदायहरु बढेका छन्, स्थापित व्यक्तिहरु ड्यालसमा थपिएका छन् र ड्यालसमा कार्यक्रम हुने भनेपछि अमेरिकाभरिनै चासोका रुपमा लिइने गरेको समेत आयोजक संस्थाका पदाधिकारीहरुले उल्लेख गरेका छन् । हरेक वर्षको जुलाईको पहिलो सप्ताहन्तलाई एएनएले आफ्नो स्थापना दिवस तथा सम्मेलन आयोजना गरेर मनाउँदै आएको छ । जुलाई ४ मा अमेरिका स्वतन्त्र भएको दिवस मनाइने र त्यही सेरोफेरोमा सार्वजनिक छुट्टी समेत हुने भएकोले सपरिवार बिदा मनाउने जाने चलन छ । त्यसैलाई उपयोग गर्दै एएनएले सम्मेलन गर्ने चलन चलाउँदै आएको छ ।

 

सम्मेलनका क्रममा नेपाली फोरम, टेक्नोलोजी ट्रान्सफर्मेसन, बिजनेस फोरम, लिगल फोरम, किड्स इभेन्ट, उमन फोरम, ब्रेन गेन फोरमका अतिरिक्त नेपाली फिल्म फेस्टिबल समेत हुनेछन् । 

कार्यक्रमलाई भव्य र सभ्य रुपमा सम्पन्न गर्नका लागि ड्यालसबासी नेपाली समुदायका अगुवाहरुले हरतरहले सहयोग गर्ने वचन दिएका छन् । कार्यक्रमको सहआयोजकका रुपमा ड्यालसका नेपालीहरुको सबैभन्दा बलियो संस्था ‘नेपाली समाज टेक्सस’ (एनएसटी) रहेको छ । एनएसटीका अध्यक्ष राजेन्द्र वाग्लेले ड्यालसमा जुलाईमा हुने एएनएको सम्मेलन अहिलेसम्मकै सबैभन्दा सफल बनाउने प्रयासमा लागेको बताए । 

 

पत्रकार सम्मेलनमा नेपाली समुदायका यमुना भट्टराई, शैलेस राज आचार्य, प्रभात दीक्षित, सुरेसचन्द्र पोखरेल लगायतले कार्यक्रमलाई सफल बनाउन संस्थाले समुदायसँग राखेका अपेक्षाका बारेमा जिज्ञासा राखेका थिए । संस्थाका गतिविधिका बारेमा अध्यक्ष भट्टराई, कृष्ण कुसुम लगायतले कार्यक्रममा अमेरिकामा रहेका र लामो समयदेखि यही बसेर बिभिन्न प्रोफेसनल क्षेत्रमा स्थापित व्यक्तित्वहरुको समेत सहभागिता हुने भएकोले समुदायले एक भएर सदभाव, सहयोगको अपेक्षा राखेका थिए । 

 

कार्यक्रमबाट वचत भएको रकम नेपाली समाज टेक्ससले सञ्चालन गर्ने पाठशालाका लागि प्रदान गरिने समेत जानकारी दिइएको थियो ।