काठमाडौ- देशको पुरानो पार्टी नेपाली कांग्रेसको सभापति पदका लागि भएको चुनावमा कसैले पनि ५० प्रतिशत मत कटाउन सकेनन् । 

 

वर्तमान सभापति शेरबहादुर देउवाले शुरु देखिनै अग्रता लिए पनि कुल खसेको मतको ५० प्रतिशत कटाउन सकेनन् । तर, मतका आधारमा देउवा दोस्रो चरणमा जितका लागि सुविधाजनक अवस्थामा छन् । 

 

मतगणनाको अन्तिम नतिजा अनुसार देउवाले २२५८ मत पाएका छन् । दोस्रो स्थानमा आएको शेखर कोइरालाले १७२९ मत पाएका छन् । यस आधारमा देउवाको मत शेखरको भन्दा करिव ५ सयले वढी छ । 

 

देउवाले दोस्रो चरणमा अहिले पाएका मतमा करिव १ सय मत थप्न सकेभने उनको जित निश्चित हुन्छ ।

 

यस आधारमा देउवा अहिले जित नजिक छन् । तर, पहिले दिएका सवैले देउवा वा कोइरालालाई नै मत दिन्छन नै भन्ने निश्चित भने छैन । 

 

अव सभापतिका लागि मात्र मतदान हुुुने भएकाले यसका लागि भने पहिलेजस्तो धेरै समय लाग्ने छैन । लाइन छिटो सर्ने छ । तर, आवश्यक प्रकृया भने पुर्याउनु पर्ने छ । 

 

यो सभापतिको नतिजाले देउवा प्यानल बलियो भएको संकेत गरेको छ । यदी यस आधारमा अन्य पदाधिकारी र केन्द्रिय सदश्यले भोट पाए भने देउवा प्यानलको बहुमत हुने छ । 

 

देशमा पांच पटक प्रधानमन्त्री भएका देउवाको विकल्प खोज्नु पर्ने माग व्यापक थियो । तर, पुराना पार्टी कांग्रेस कायकर्ता भने नेतृत्वको परिवर्तनका लागि अझ तयार नभएको यो नतिजाले देखाएको छ । 

 

कांग्रेस कार्यकर्ताले जनभावना अनुसार पार्टीमा नेतृत्व परिवर्तन नचाहेको पनि देखाएको छ । संसद र स्थानिय निकायको आउने चुनावमा यसको कस्तो प्रभाव पार्छ हेर्न बांकी छ ।