नेपाल

चितवन निकुञ्जमा सौराहा माडी जोड्ने नयाँ पदमार्ग तयार

प्रकाशित |
कसरा, चितवन । पर्यटकीय क्षेत्र सौराहा र माडी जोड्न चितवन राष्ट्रिय निकुञ्जभित्र नयाँ पदमार्ग तयार भएको छ । विश्व वातावरण दिवसको अवसर पारेर शुक्रबार साने पदमार्गको औपचारिक आरम्भ गरियो । भूकम्पका कारण पर्यटक आवागमन ठप्प भए पनि पर्यटक आउन थालेपछि सौराहा–माडी जोड्न सहज हुने निकुञ्जका अधिकारीहरुले बताएका छन् ।
 
सौराहानजिकको खोरसोरबाट पटिहानी छितामाई मन्दिरसम्म यसअघि नै पलमार्ग तयार भएको थियो । शुक्रबारबाट चालु भएको नयाँ पदमार्ग छितामाइदेखि राप्तीपारीको निकुञ्जको पोष्ट जर्नेली हुँदै माडीसम्म पुग्ने छ । निकुञ्जभित्रको चुरे पहाड छिचोलेर सो पदमार्ग माडीको बोटे सिमरा निस्कने छ । छितामाइदेखि माडी साढे ११ किलोमिटर र छितामाईदेखि खोरसोर नौ किलोमिटर छ ।
 
‘यो पदमार्ग चालू भएपछि पर्यटनको उच्च विकास भएको सौराहा, पर्यटनको विस्तार हुँदै गरेको पटिहानी र भर्खर पर्यटनको सुरुवात हुन लागेको माडी जोडिने छ’ चितवन राष्ट्रिय निकुञ्जका प्रमुख संरक्षण अधिकृत कमलजंग कुँवरले भने । सौराहाबाट दुई दिन लगाएर माडी निस्कन चाहने पर्यटकका लागि यो पदमार्ग निकै उपयोगी हुने कुँवरले बताए ।
 
चरा प्रेमी पर्यटकहरु यो पदमार्गमा आकर्षित हुने उनको विश्वास छ । ‘खास गरेर निकुञ्जले पर्यापर्यटनमार्फत् स्थानीयको जीवनस्तरमा सुधारका लागि उपार्जनमा सहयोग गर्ने नीति लिएको छ । यो पदमार्गले त्यसलाई टेवा दिन्छ’ प्रमुख संरक्षण अधिकृत कँुवरले भने । निकुञ्जमा पाइने दुर्लभ जनावर गैँडा, बाघ पनि सो क्षेत्रमा छन् । हरिणका झुण्ड र गौरी गाईको बथान पनि त्यही क्षेत्रमा देख्न पाइन्छ ।
 
‘पर्यटकहरुका लागि पदमार्ग गर्न मिल्ने नै भयो । यसका साथै हामी निकुञ्जबाट पनि नियमित गस्तीका लागि यो मार्ग सदुपयोग हुन्छ । फायर लाइन ९अग्नी रेखा० हुने भएकाले डढेलो पनि नियन्त्रण हुन्छ’ प्रमुख संरक्षण अधिकृत कुँवरले भने । यसका साथै माडी जाने नियमित बाटोमा बाढी कटानले समस्या आए विकल्पका रुपमा यसलाई पनि प्रयोग गर्न मिल्ने उनले बताए ।
 
‘पर्यटन विस्तारमा यो पदमार्ग सहयोगी हुन्छ । तर यसको प्रवद्र्धनका लागि निकुञ्जले अझै धेरै कामहरु गर्न आवश्यक छ’ चितवन निकुञ्जअन्तर्गतको माडी बघौडा मध्यवर्ती उपभायक्ता उप समितिका अध्यक्ष प्रभु महतोले भने । 
 
निकुञ्जका जनावरहरुका साथै गाउँमा थारु र अन्य जात जातिका सांस्कृतिक रहनसहनले यो क्षेत्रमा पर्यटकीय सम्भावना प्रचुर रहेको महतोको भनाइ छ । माडीमा होटलहरुको सम्भावना भए पनि तत्कालका लागि समुदायले होमस्टे सञ्चालन गर्ने योजना बनाएको महतोको भनाइ छ । 
 
माडीको अयोध्यापुरी शिवद्वारमा मगर समुदायले होमस्टे सुरू गरेको उनले जानकारी दिए । विस्तारै अन्यत्र पनि होमस्टेहरु खुल्ने उनको भनाइ छ । शिवद्वारदेखि सिधै सौराहा जाने पदमार्ग पनि परीक्षणको चरणमा छ ।
‘यो पदमार्गले निकुञ्जको पुर्व, मध्य र माडी क्षेत्रलाई जोड्न निकै ठूलो मद्दत गर्छ । संरक्षणको प्रतिफल पर्यटनमार्फत् समुदायमा जान सहयोग पुग्छ’ पटिहानी मध्यवर्ती उपभोक्ता समितिका सचिव बोधराज सापकोटाले भने । 
 
चितवन निकुञ्जमा भूकम्पका कारण पर्यटकहरु नआए पनि समन्य अवस्था रहँदा यहाँ पौने दुई लाखको हाराहारीमा स्वदेशी विदेशी पर्यटकहरु आउने गरेका छन् । 
 

हिमालय खबर

हिमालय खबर -

थप »

यो खबर पढेर तपाईलाई कस्तो महसुस भयो ?

प्रतिक्रिया