क्यानबेरा । मध्यपूर्वमा जारी द्वन्द्वका कारण इन्धनको मूल्य बढेपछि अस्ट्रेलियामा घरपरिवारको खर्च उल्लेखनीय रूपमा वृद्धि भएको छ । आधिकारिक तथ्याङ्कअनुसार मार्च महिनामा घरपरिवारको खर्च १.६ प्रतिशतले बढेको छ ।

यो वृद्धि फेब्रुअरीमा भएको ०.३ प्रतिशत र जनवरीको ०.२ प्रतिशत वृद्धिपछि आएको हो । अस्ट्रेलियन ब्यूरो अफ स्टाटिस्टिक्स (एबिएस) का अनुसार मार्च २०२५ को तुलनामा खर्च ६.३ प्रतिशतले बढेको छ ।

एबिएसका व्यापार तथ्याङ्क प्रमुख टम लेका अनुसार यातायात क्षेत्रमा ५.१ प्रतिशतको वृद्धि भएको छ, जसको मुख्य कारण इन्धनको मूल्य वृद्धि हो । मध्यपूर्व द्वन्द्वका कारण मार्चको सुरुदेखि नै इन्धनको मूल्य बढ्न थालेको र महिनाको अन्त्यसम्म उच्च बिन्दुमा पुगेको थियो ।

इन्धन महँगो भएपछि उपभोक्ताहरूले साना–साना मात्रामा पटक–पटक इन्धन भर्ने प्रवृत्ति अपनाएको देखिएको छ । साथै केही घरपरिवारले निजी सवारीको सट्टा सार्वजनिक यातायात प्रयोग गर्न थालेको सङ्केत पनि देखिएको छ ।

खाद्य क्षेत्रमा खर्च १.७ प्रतिशतले बढेको छ, जसको कारण मूल्य वृद्धि र सम्भावित आपूर्ति अवरोधको चिन्ताले गर्दा गरिएको सञ्चिति रहेको जनाइएको छ ।

यद्यपि इन्धनको मूल्य ३२.८ प्रतिशतले बढ्दा खरिद गरिएको इन्धनको परिमाण भने १.३ प्रतिशतले घटेको छ ।

मार्च त्रैमासमा घरपरिवारको कुल खर्चको परिमाण ०.७ प्रतिशतले बढेको छ, जुन लगातार छैटौं त्रैमासिक वृद्धि हो । यो वृद्धि मुख्यतः स्वास्थ्य र खाद्यजस्ता अत्यावश्यक क्षेत्रमा भएको खर्चले अघि बढाएको हो ।

वार्षिकरूपमा हेर्दा घरपरिवारको खर्च २.८ प्रतिशतले बढेको छ, जुन सन् २०२३ को मध्यपछि सबैभन्दा उच्च वृद्धि दर हो । सिन्ह्वा