काठमाडौं – पूर्वप्रधानन्यायाधीश सुशीला कार्कीलाई आजै बेलुकी अन्तरिम सरकार प्रमुख बनाउने सहमति जुटेको छ।

शुक्रबार दिनभर चलेको छलफलपछि प्रतिनिधि सभा विघटन गर्ने निर्णयमा प्रमुख दलहरूबीच सहमति भएको हो। शीतल निवास स्रोतका अनुसार, सुरुमा प्रतिनिधि सभा विघटनपछि मात्रै सरकारको नेतृत्व दिनुपर्ने अडानमा रहेका राष्ट्रपति रामचन्द्र पौडेल आन्दोलनकारी दबाबपछि पछि हटेका हुन्।

आन्दोलनरत युवाहरूले तत्काल शीतल निवास घेराबन्दी गर्ने चेतावनी दिएपछि पौडेलले शीर्ष नेताहरूसँग छलफल गर्दै आफू प्रतिनिधि सभा विघटन गर्ने र त्यसलगत्तै सुशीला कार्कीलाई प्रधानमन्त्रीको शपथ गराउने तयारीमा रहेको बताएका थिए।

हाल शीतल निवासमा प्रतिनिधि सभा विघटनको निर्णयको मस्यौदा, कार्कीलाई प्रधानमन्त्री नियुक्त गर्ने पत्रको तयारीलगायतका काम भइरहेका छन्।