काठमाडौँ । भाटभटेनी सुपरमार्केटले सुरक्षा गार्ड दुलप्रसाद पराजुली (कृष्ण)लाई पुरस्कृत गरेको छ । गत चैत १५ गते राजावादीहरुले आयोजना गरेको आन्दोलनका क्रममा भाटभटेनी लुट्न पुगेका लुटेराहरुलाई भगाएर बहादुरी देखाएका उनलाई भाटभटेनीले एक कार्यक्रमबीच नगदसहित पुरस्कृत गरेको हो ।

भाटभटेनीले पराजुलीलाई ५ लाख १ हजार १११ रुपैयाँ पुरस्कार र पाँच ग्रेड बढुवाको सम्मान प्रदान गरेको हो । उनलाई भाटभटेनीका मालिक मीनबहादुर गुरूङले दुबोको माला लगाइदिएर सम्मान गरेका हुन् ।

कार्यक्रममा लुटपाट र तोडफोडमा भाटभटेनीलाई जोगाउन भूमिका खेल्ने अरु कर्मचारीहरुलाई पनि सम्मान गरिएको छ । सुरक्षा गार्ड सूर्य गिरी, दीपेश खड्का, सोमबहादुर भुजेललाई २५ हजार १ रुपैयाँ र एक ग्रेड बढुवा गरिएको भाटभटेनीले जनाएको छ ।

यस्तै, ग्रोसरी सिनियर सुपरभाइजर सागर गुरूङलाई ५१ हजार एक सय ११ को चेक र दुई ग्रेड बढुवा प्राप्त गरेका छन् । पराजुली लुटेराहरूलाई लखेटेको भिडिओ सामाजिक सञ्जालमा भाइरल भएको थियो । २२ वर्षदेखि पराजुली भाटभटेनीमा सुरक्षा गार्डको रुपमा काम गर्दै आइरहेका छन् ।