काठमाडौँ । राजनीतिक दलका नेता र मानवअधिकारकर्मीले सिरहाको औरही गाउँपालिकालगायत दलित समुदायमाथि देशभर भइरहेका विभेद अन्त्य गर्नुपर्ने माग गरेका छन् ।

राष्ट्रिय दलित पत्रकार सङ्घ नेपाल, उपत्यका प्रदेश, ओजस्वी मल्टी मिडिया ग्रुप र नेपाल दलित महिला उत्थान सङ्घ (एड्वान)ले माइतीघर मण्डलामा आज आयोजना गरेको ‘सडक संवाद’ कार्यक्रममा नेपाली कांग्रेसका नेता एवं पूर्वमन्त्री मीन विश्वकर्माले सिरहा, रुपन्देही, दैलेख, कालीकोट, कास्की, धादिङ, सप्तरी र रुकुमपश्चिमलगायत जिल्लामा विभिन्न निहुँमा दलित समुदायका नागरिक मारिँदा पनि कानुनबमोजिम कारबाही हुन नसकेको भन्दै सरकारको ध्यानाकर्षण गराए ।

मानवअधिकार तथा शान्ति समाजका संस्थापक तथा अधिकारकर्मी कृष्ण पहाडीले देश परिवर्तनका निम्ति दलित समुदायले पटकपटक योगदान पु¥याए पनि उनीहरूको संवैधानिक अधिकारको व्यावहारिक कार्यान्वयन हुननसकेको भन्दै आपत्ति जनाए । उनले भने, “दलित समुदायले विसं २०४६, २०६२/०६३ लगायत मुलुकको परिवर्तनका निम्ति पटकपटक भएका आन्दोलनमा अतुलनीय योगदान पु¥याउँदै आएका छन्, तर उनीहरूले पाउनुपर्ने अधिकार पाएका छैनन् । संवैधानिकरूपमा प्राप्त अधिकार पनि कार्यान्वयन हुन सकेका छैनन् । अब अधिकार कार्यान्वयनका लागि एकीकृत आन्दोलन गर्नुपर्ने आवश्यकता छ ।”

संविधानसभा सदस्य विनोद पहाडीले दलितका सवालमा संविधानको प्रस्तावना, धारा २४ र ४० को पनि व्यावहारिक कार्यान्वयन हुनुपर्ने माग गरे ।

यही चैत १७ गतेदेखि औरही गाउँपालिकामा हुने भनिएको महायज्ञका लागि भन्दै चैत १० गते औरही–५ का दीपक मल्लिक (डोम)को घर डोजर लगाएर भत्काइएको थियो । पछि दलितले छोएको भन्दै घरले चर्चेको जमिनको माटो फालिएको भन्दै आलोचना भइरहेको छ ।