काठमाडौँ । गृहमन्त्री रमेश लेखकसँग नेपालका लागि कतारका राजदूत महामहिम मिसाल बिन मोहम्मद अल अन्सारीले शिष्टाचार भेटघाट गरेका छन् ।

बिहीबार सिंहदरबारस्थित गृहमन्त्रालयमा भएको भेटवार्तामा गृहमन्त्री लेखक र राजदूत अल अन्सारीबीच नेपाल र कतारबीचको गहिरिँदै गएको सम्बन्धका बारेमा चर्चा भएको थियो ।

भेटमा क्रममा गृहमन्त्री लेखकले हमासको अपहरणमा रहेका नेपाली विद्यार्थी विपीन जोशीको रिहाइका लागि आवश्यक सहयोग गरिदिन राजदूत अल अन्सारीलाई विशेष आग्रह गरेका थिए ।

गृहमन्त्री लेखकले कतारमा रहेका नेपाली कामदारहरुलाई २४ घन्टा नै बिमाको व्यवस्था तथा कतारमा रही मृत्यु एवं घाइते भएका नेपालीहरुको राहत र उद्धारमा जोड दिँदै विभिन्न जेलमा सजाय भोगिरहेका नेपाली नागरिकलाई आममाफी तथा सजाय छूटको व्यवस्था मिलाइदिनसमेत आग्रह गरे ।

सीमापार हुने आर्थिक अपराध नियन्त्रणका विषयमा नेपाल र कतारबीच सहकार्य बढाउनेपर्नेमा गृहमन्त्री लेखकले जोड दिए ।

यस्तै, राजदूत अल अन्सारीले विपीन जोशीको रिहाइका लागि कतारले आवश्यक पहल गरिरहेको जानकारी दिए । कतारको विकासमा नेपालीहरुको सहयोगको प्रशंसासमेत राजदूतले गरेका थिए ।