ड्यालस (टेक्सस) । नेपाल जर्नीद्वारा चितवनको भरतपुरमा निर्माणाधिन पुस्तकालयको निर्माण ४२ प्रतिशत पुरा भएको छ ।

पुस्तकालयसँग सरोकार राख्ने र हाल अमेरिकामा रहेकाहरुले शनिबार आयोजना गरेको कार्यक्रममा सन् २०१७ देखि पुस्तकालयको लक्ष्य राखेर सुरु भएको अभियान अब कार्यान्वयन तहमा पुगेको जानकारी दिए ।

भरतपुर महानगरपालिका– ४ लङ्कुमा निर्माण सुरु भएको पुस्तकालयको कुल लागत ५ करोड रुपियाँ रहेको छ । आवश्यक पर्ने २ कठ्ठा १० धुर जग्गा भरतपुर महानगरपालिकाले निशुल्क उपलव्ध गराएको पनि त्यस अवसरमा जानकारी दिइयो ।

भवनको निर्माण सुरु भैसकेको र यो पुस्तकालय पुर्ण रुपमा अपाङ्गमैत्री हुनेछ । ह्विलचेयर र्याम्प, लिफ्ट र ब्रेललिपी सहित हरेक उमेर, वर्गका व्यक्तिहरुका लागि यो पुस्तकालय पहुँचयोग्य हुने समेत कार्यक्रममा जानकारी दिइएको थियो ।

कार्यक्रममा नेपाल जर्नीकी अध्यक्ष मौसमी श्रेष्ठले संस्थाले काठमाडौंमा पुस्तकालय स्थापना गर्ने लक्ष्य लिएपनि जग्गा प्राप्ती हुन नसकेको उल्लेख गर्दै भरतपुर महानगरले जग्गा दिएका कारण परियोजना चितवन गएको उल्लेख गरिन् । आउँदा दिनमा पनि संस्थाले शिक्षा र स्वास्थको क्षेत्रमा कामहरु गर्दै जाने प्रतिवद्धता समेत श्रेष्ठले व्यक्त गरिन् ।

सोही अवसरमा नेपाल जर्नीकी कोषाध्यक्ष उमा अर्याल न्यौपानेले भवनको निर्माणमा मात्र तीन करोड २१ लाख रुपैयाँ खर्च हुने उल्लेख गर्दै अहिलेसम्म ९० लाख रुपैयाँ निर्माणकर्ता ठेकेदारलाई भुक्तानी गरिसकेको र अमेरिकाकै बैंकमा ६९ हजार तीनसय ८३ डलर मौज्दात रहेको जानकारी दिइन् । परियोजना सम्पन्न गर्नका लागि आवश्यक रकम पुस्तकालयप्रेमीहरु, संसारका बिभिन्न देशमा रहेका नेपालीहरुबीच संकलन गरेर पठाउने तयारी भैरहेको समेत उनले उल्लेख गरिन् ।

कार्यक्रममा नेपाल जर्नी इञ्जिनियरिङ्ग प्रमुख राजीब श्रेष्ठले २०८२ जेठभित्र पुस्तकालय निर्माण सम्पन्न गरेर स्थानीय समुदायलाई हस्तान्तरण गर्ने योजना रहेको बताए ।

पुस्तकालयका लागि हालसम्म संकलन भएको रकम र प्रगति विवरण सार्वजनिक गर्ने उद्वेश्यले आयोजित कार्यक्रममा युलेस सिटीका उपमेयर टीका पौडेलले पुस्तकालयको निर्माण जतिसक्दो छिटो सम्पन्न गरेर समुदायलाई लाभान्वित बनाउन आग्रह गरे । पौडेलले तत्कालै व्यक्तिगत तर्फबाट एकहजार एक डलर एक सेन्ट पुस्तकालयका लागि सहयोग समेत प्रदान गरेका थिए ।

एनआरएन अमेरिकाका वरिष्ठ उपाध्यक्ष विकास उप्रेती, उपाध्यक्ष भानु खरेल, समाजसेवी धनञ्जय ढकाल, प्रोफेसर प्रभात दीक्षित, जनसम्पर्क समितिका सभापति ज्ञानेन्द्र कार्की लगायतले पुस्तकालयको महत्व र अझै विशेष क्षमता भएका वर्गका लागि ठूलो सहयोग हुने धारणा राख्दै मातृभूमिका लागि प्रवासमा रहेकाहरुको नमूनायोग्य कार्य हुने समेत चर्चा गरे ।

दुई तल्ले भवनको पुस्तकालयमा एकसय जना अटाउने सम्मेलन कक्ष, १७ जना क्षमताको बैठक कक्ष, क्याफ्टेरिया समेत रहनेछन् । पुस्तकालयमा अडियो भिडियो सेक्सन, ब्रेल कक्ष समेत रहनेछन् ।

अमेरिकामा रहेका पुस्तकालयहरुकै डिजाइनमा भरतपुरमा यो पुस्तकालय निर्माण हुने समेत त्यस अवसरमा जानकारी दिइएको थियो ।