चितवन । राष्ट्रिय क्रिकेट टोलीका पूर्वकप्तान क्रिकेटर सन्दीप लामिछानेलाई भरतपुर महानगरपालिकाले नगद एक लाख रूपैयाँसहित सम्मान गरेको छ । मंगलबार एक कार्यक्रमका बीच भरतपुर महानगर प्रमुख रेनु दाहाल र उपप्रमुख चित्रसेन अधिकारीले क्रिकेटर लामिछानेलाई सम्मान गरेका हुन् ।

नगरप्रमुख दाहालले खेलाडीको सम्मानले अन्य खेलाडीलाई समेत प्रोत्साहन मिल्ने बताइन् । खेलाडी उत्पादनका लागि महानगरले विद्यालयस्तरमै विभिन्न प्रतियोगिताको आयोजना गर्दै आएको उनले बताइन् ।

भरतपुरमा निर्माणाधीन गौतमबुद्ध अन्तर्राष्ट्रिय क्रिकेट रङ्गशाला २६ महिनाभित्र निर्माण सम्पन्न हुने र सन् २०२७ मा हुने यु–१९ क्रिकेट यही रङ्गशालामा आयोजना गर्न पहल गरिने उनले बताइन् ।

सम्मानित हुने क्रिकेटर लामिछानेले समग्र चितवनको क्रिकेट विकासका लागि आफूले सक्दो सहयोग गर्ने बताए । रङ्गशाला निर्माणको काम अगाडि बढेकोमा आफूलाई खुसी लागेको पनि उनले बताए ।

जिल्ला क्रिकेट संघका अध्यक्ष सुदीप पियाले खेल क्षेत्रको विकासका लागि महानगरले निर्वाह गरेको भूमिकाको सराहना गरे ।

क्रिकेटर लामिछानेलाई गृहजिल्लामा नगदसहित सम्मान

यसैबीच, क्रिकेटर सन्दीप लामिछाने गृहजिल्ला चितवनमा समानित भएका छन् । लामिछानेलाई मंगलबार विभिन्न संस्थाले नगदसहित सम्मान गरेको हो ।

लामिछानेलाई चितवन क्रिकेट संघ र सेन्ट्रल कलेज अफ भोकेसनल ट्रेनिङ प्रालिले नगद एक लाख रुपैयाँसहित सम्मान गरेको छ । मंगलबार दिउँसो सेन्ट्रल टावरमा आयोजित एक कार्यक्रमका बीच उनलाई सम्मान गरिएको हो ।

नेपाली क्रिकेटमा पुर्‍याएको योगदान तथा टी २० अन्तर्राष्ट्रियमा एक सय विकेट लिएको अवसर पार्दै लामिछानेलाई सम्मान गरिएको सेन्ट्रल कलेजका प्राचार्य यज्ञविलास पौडेलले बताए । लामिछानेले क्रिकेटको माध्यमबाट देशलाई अतुलनीय योगदान गरेको पौडेलको भनाइ थियो ।

सो अवसरमा लामिछानेले आफ्नो सुरूवाती दिनको स्मरण गरेका थिए । उनले नारायणगढको क्याम्पाचौरस्थित नेटमा अभ्यास गर्दाको दिनहरु स्मरण गर्दै आफ्नो लक्ष्यमा पुग्न कडा मेहेनतका साथ अघि बढ्न युवा खेलाडीहरुलाई सुझाव दिए । उनले सम्मानका लागि सेन्ट्रल कलेज र चितवन क्रिकेट संघलाई धन्यवाद व्यक्त गरे ।