नयाँ दिल्ली । भारतीय खर्बपति व्यापारी मुकेश अम्बानीका कान्छा छोरा अनन्त र राधिका मर्चेन्टको जुलाईमा बिहे हुँदैछ । यसबीच दोस्रो प्रि–वेडिङ कार्यक्रम सुरू हुन लागेको छ ।

यही मंगलबारदेखि बिहीबारसम्म चल्ने सो कार्यक्रम इटली र फ्रान्सबीचको समुद्रमा ‘सेलिब्रेटी एसेन्ट’ नामक क्रुजमा हुँदैछ । क्रुज २८ मेमा इटलीको पालेर्मो बन्दरगाहबाट प्रस्थान गर्नेछ भने ४ हजार ३८० किमी यात्रा तय गरेर सदर्न फ्रान्समा पुगेर यात्रा सकिनेछ । अम्बानी परिवारले मियामीबाट अर्कै क्रुज मगाएका थिए । तर, फ्रान्समा त्यो क्रुज पार्क गर्न समस्या हुने भएपछि माल्टाबाट सेलिब्रेटी एसेन्ट मगाइएको हो ।

समारोहमा सहभागी हुनका लागि आठ सय जना अतिथिहरू १२ वटा विमान चढाएर इटली पुर्‍याइँदैछ । यीमध्ये तीन सय जना भिभिआइपी हुने बताइएको छ । यी अतिथिको आतिथ्यताका लागि क्रुजमा छ सय जना कर्मचारी पनि हुनेछन् । यस कार्यक्रमका लागि अम्बानी दम्पतीले ७५ अर्ब ७५ करोड भारु अर्थात् ९० करोड डलर खर्च गर्दैछन् ।

यसअघि मार्च १ देखि ३ को बीचमा भएको पहिलो प्रि–वेडिङ कार्यक्रममा अम्बानी परिवारले १२ अर्ब ५० करोड भारु खर्च गरेको थियो । सो समारोहमा खानपिनमा मात्रै २ अर्ब १० करोड भारु खर्च भएको बताइएको छ ।

प्रि-वेडिङ समारोह इटालीको पार्लेमो सहरमा दिवा भोजबाट सुरु हुनेछ । दिवा भोजपछि सबै पाहुनाहरू क्रुजमा चढ्नेछन् र क्रुजमै स्टाररी नाइट मनाइने छ।

समारोहको दोस्रो दिनलाई ‘रोमन हलिडे’ भनिएको छ जहाँ पाहुनाहरूले पर्यटकको रूपमा लुगा लगाउनु पर्नेछ। त्यहाँ एक ग्रीको (रोमन) थीम टोगा पार्टी हुनेछ। पार्टीमा पाहुनाहरूले पुरातन रोमन शैलीको लुगा र चप्पल लगाउनु पर्नेछ।

समारोहको तेस्रो दिनको कार्यक्रमलाई ‘भी टर्न वन अन्डर द सन’ भनिएको छ। उक्त साँझ मास्करेड र त्यसपछि ‘पर्डन माई फ्रेन्च’ नाम दिइएको पार्टी हुनेछ।

चारदिने प्रि-वेडिङ ब्यासको अन्तिम दिनको कार्यक्रमलाई ‘ला डोल्से भिटा’ नाम दिइएको छ जसको अंग्रेज़ी अर्थ ‘स्विट द गुड लाइफ हो।

समारोहमा सहभागी हुन अम्बानीका परिवारका सदस्य, साथीभाइ र भारत तथा विदेशबाट सेलिब्रेटीहरू इटली पुगिसकेका छन् । यस सूचीमा शाहरुख खान, सलमान खान, रणवीर सिंह, रणवीर कपुर र आलिया भट्टजस्ता कलाकारको नाम समावेश छ।