ड्यालस (अमेरिका) । नेपाली समाज टेक्ससले सञ्चालन गरेको ग्लोबल नेपाली पाठशालाका विद्यार्थीहरुको दीक्षान्त समारोह आइतबार सम्पन्न भएको छ ।

कार्यक्रममा ३४७ विद्यार्थीहरु दीक्षित भएका थिए । उनीहरुलाई त्यस अवसरमा प्रमाणपत्रसमेत वितरण गरियो । त्यस अवसरमा विद्यार्थीहरुले आफ्नो प्रतिभासमेत देखाएका थिए ।

कार्यक्रममा नेपाली समाज टेक्ससका अध्यक्ष राजेन्द्र वाग्ले, महासचिव विजय भूषाल, युलेस सिटी काउन्सिल सदस्य टीका पौडेल, नेपाली सांस्कृतिक तथा आध्यात्मिक केन्द्रकी अध्यक्ष सीता सापकोटा, प्रिन्सिपल भोजबहादुर बलायर लगायतले बधाई र शुभकामना दिएका थिए ।

यस पटक युथ लिडरसिपमा ५१, आर्ट एण्ड क्राफ्टमा १७, कोडिङ लेभल टु मा १६, डान्समा ५५, म्याथमा ३५, मेडिटेसनमा १५, नेपाली नेवल वानमा ६७, लेबल टुमा ३८ र लेबल थ्रीमा २१ विद्यार्थी सहभागी थिए ।

गत जनवरी २७ बाट यस पटकको कक्षा सुरु भएको थियो । नेपाली समाजका महासचिव विजय भूषालका अनुसार अब बालबालिकाहरुका लागि समर क्याम्प आउँदो जुलाइ तेस्रो साता सुरु हुनेछ । त्यसपछि अगष्ट तेस्रो साताबाट पाठशालाको अर्को सेसन सञ्चालन हुनेछ ।

आइतबारको दीक्षान्त कार्यक्रममा अभिभावकहरुको समेत उल्लेख्य उपस्थिति रहेको थियो ।