काठमाडौँ । काठमाडौँ महानगरपालिकाका मेयर बालेन्द्र शाह (बालेन)ले आफ्नो जन्मदिन पारेर कवितासङ्ग्रह ‘अश्र’ सार्वजनिक गरेका छन् ।

मेयर बालेनले आफ्नो कवितासङ्ग्रह अश्र सार्वजनिक भएको सामाजिक सञ्जालमार्फत जानकारी दिँदै जन्मदिनको शुभकामना दिने सबैलाई धन्यवाद दिएका छन् ।

बालेनको कवितासङ्ग्रह अश्र बुकहिल पब्लिकेसन प्रालिले प्रकाशन गरेको हो । अश्रमा बालेनले लेखेका सयभन्दा बढी कविता संग्रहित छन् । कवितासङ्ग्रहमा पहिलो खण्डमा प्रेम, दोस्रो खण्डमा प्रेम वियोग, तेस्रो खण्डमा राजनीति र चौथो खण्डमा दर्शनसम्बन्धी छोटा-छोटा कविताहरु छन् ।

कवितासङ्ग्रहमा हरेक पृष्ठमा कवितासँग मिल्दा स्केच पनि कोरिएका छन् । कवितासङ्ग्रहको मूल्य ६६६ रुपैयाँ तोकिएको छ । कवितासङ्ग्रह अश्र शनिबारदेखि बजारमा उपलब्ध हुनेछ ।