काठमाडौँ । नयाँ वर्ष २०८१ को अवसर पारेर रातोपाटी डटकमका पाठक तथा दर्शकका लागि दुई महत्त्वपूर्ण सौगात आएको छ । सबैको, सबैभन्दा राम्रो’ हुने ध्येयका साथ रातोपाटीले २०७० जेठ २७ गतेबाट रातोपाटी डटकम न्युज पोर्टल सुरू गरेको हो ।

करिब ११ वर्षको अनुभवपछि पाठकलाई रातोपाटी परिवारको निःशुल्क सदस्य बनाउने उद्देश्यले दुईवटा सौगात एकैसाथ पस्केको छ । नयाँ स्वरूपमा ‘रातोपाटी एप’ र ‘लग–इन’ सिस्टमसँगै ‘एक्सक्लुसिभ स्टोरी’ सेक्सनमा रहेका सामग्री क्लिक गरी मेल वा फेसबुकमार्फत सदस्य बनेर पाठकले आफ्नो मोबाइलमा ‘रातोपाटी एप’ डाउनलोड गर्न सक्नेछा् ।

प्रविधिको जमानामा मोबाइलमैत्री ‘रातोपाटी एप’ संसारका जुनसुकै स्थानमा रहेका स्नेही पाठक तथा दर्शकलाई रातोपाटीसँग जोड्ने एउटा सुन्दर कडी र अभ्यास बन्ने विश्वास पनि रातोपाटीले लिएको छ । ुप्ले स्टोरुमा उपलब्ध भइसकेको एप, एप्पल स्टोरमा पनि छिट्टै उपलब्ध हुने क्रममा रहेको छ ।

रातोपाटी ‘एक्सक्लुसिभ स्टोरी’मा समाजका लुकेका र लुकाइएका कथा, भ्रष्टाचार (सङ्गठित र असङ्गठित), कुशासन, अन्याय, असमानता, विकृति, विसंगतिविरुद्धका खोजपूर्ण सामग्रीले प्राथमिकता पाउने छन् ।

यसरी जनताका जीवनसँग जोडिएका ज्वलन्त विषयहरुमा आधारित सामयिक सामग्रीका साथै राष्ट्रलाई भविष्यको बाटो देखाउने तथा हाम्रो इतिहास र संस्कृति अभिलेख हुने पठनीय र सङ्ग्रहणीय सामग्री पस्किने रातोपाटीको प्रयत्न हुनेछ ।

पाठक तथा दर्शकलाई अवगतै छ, व्यावसायिक पत्रकारिताका लागि पाठक र सञ्चारमाध्यम दुवैका आ–आफ्नै जिम्मेवारी हुन्छन् । रातोपाटीको दायित्व सत्य–तथ्य सामग्री पस्कनु हो र यसबापत केही मूल्य तिर्नु सचेत र जिम्मेवार पाठकको जिम्मेवारी हो । विज्ञापनको भरमा मात्रै भर पर्दा सञ्चारमाध्यमहरूलाई व्यावसायिक पत्रकारिता गर्न चुनौती हुन्छन् । त्यसैले आदरणीय पाठक तथा दर्शकको सहयोगमा त्यस्ता चुनौती चिर्न चाहेको रातोपाटीको भनाइ छ ।

‘एक्सक्लुसिभ स्टोरी’हरु पढ्न, हेर्न अब ‘लग–इन’ सिस्टममा गएर डब्लुडब्लुडब्लुु रातोपाटी डटकमको सदस्य बन्नुपर्ने अभ्यासको थालनी गरेको र ‘एक्सक्लुसिभ स्टोरी’ हरु पनि, आगामी ६ महिनासम्म निःशुल्क नै उपलब्ध गराउने रातोपाटीले जनाएको छ ।