आज विहान ताइवानमा गएको ७.४ म्याग्निच्यूडको विनाशकारी भूकम्पले जनधनको ठूलो क्षति गरेको छ। भूकम्पका कारण हालसम्म ९ जनाको ज्यान गएको ताइपेइस्थित नेशनल फायर एजेन्सीले जनाएको छ। शक्तिशाली भूकम्पका कारण कैयन अग्ला भवन र सडक संजाल क्षतिग्रस्त भएकाछन् भने ७०० जना भन्दा बढी घाइते भएको समाचारमा जनाइएको छ। हुवालिन काउण्टी अन्तर्गतको न्यू ताइपेइ सिटीमा सयौं अग्ला भवनहरु ढलेका वा क्षतिग्रस्त भएकाछन् भने सडक यातायातहरु अवरुद्ध भएकाछन्। कैयन विदेशी नागरिकहरु समेत भत्किएका सडक संजाल र सुरुङ मार्गमा अलपत्र परेकाछन्।

आपतकालीन उद्धार कार्यहरु जारी रहेकाले भूकम्पका कारण भएको मानवीय र भौतिक क्षति निकै भएको अनुमान गरिएको छ। घाइतेहरुको स्थानीय अस्पतालमा उपचार भइरहेको सिएनएन लगायतका समाचार एजेन्सीहरुले जनाएकाछन्। अन्तराष्ट्रिय सहयोगका लागि तत्काल आव्हान भइ नसकेको भएपनि मानवीय सहयोगका लागि कैयन अन्तराष्ट्रिय संस्थाहरु तयार रहेको समाचारमा जनाइएको छ।