धादिङ । बुधबार बिहान धादिङको गजुरी गाउँपालिका वडा नम्बर–५, घाटबेँसीस्थित पृथ्वीराजमार्गमा भएको बस दुर्घटनामा परी एक महिलासहित ७ जनाको ज्यान गएको छ भने ३९ जना घाइते भएका छन् ।

कपिलवस्तुबाट काठमाडौँका लागि छुटेको लु २ ख २१२१ नम्बरको यात्रुवाहक बस बुधबार बिहान साढे चार बजेतिर अनियन्त्रित भई राजमार्गबाट १ सय मिटर तल त्रिशूली नदीमा खसेको थियो ।

दुर्घटनामा परी १ जना महिला र ६ जना पुरूष गरी ७ जनाको मृत्यु भएको भए पनि मृतकको सनाखत तथा नामावली विवरण आउन बाँकी रहेको जिल्ला प्रहरी कार्यालय धादिङले जनाएको छ ।

घाइतेमध्ये गम्भीर अवस्थाका १४ जनालाई काठमाडौँ पठाइएको छ भने २० जनाको गजुरी अस्पताल प्रालि, गजुरी र ५ जनाको प्राथमिक स्वास्थ्यकेन्द्र गजुरीमा उपचार भइरहेको छ ।