भरतपुर । अल स्टार स्पोर्ट्स एकेडेमी धनगढीले लेडी जेसीज कप राष्ट्रिय महिला फुटबलको उपाधि जितेको छ । शनिबार सम्पन्न फाइनल खेलमा रौतहट महिला फुटबल एकेडमीलाई १–० ले हराउँदै धनगढी च्याम्पियन बनेको हो ।

नेपाल प्रहरी शिक्षालय (भरतपुर तालिमकेन्द्र) मा भएको खेलमा धनगढीलाई विजयी गराउन बिर्सना चौधरीले निर्णायक गोल गरिन् । उनले पहिलो हाफमा गरेको गोल नै धनगढीलाई जिताउन पर्याप्त भयो । बिर्सना नै प्लेयर अफ दी म्याच बनिन् । उनले पाँच हजार रुपैयाँ प्राप्त गरिन् ।

च्याम्पियन बनेको धनगढीले ट्रफीसहित दुई लाख रुपैयाँ प्राप्त गरेको छ । उपविजेतामा सीमित रौतहटले एक लाख रुपैयाँमा चित्त बुझाएको छ । च्याम्पियन टिमकी कप्तान निरु थापा प्लेयर अफ दी टुर्नामेन्ट बनिन् । उनले ट्रफीसहित २० हजार रुपैयाँ प्राप्त गरिन् ।

धनगढीकी उषा नाथ प्रतियोगिताभरको उत्कृष्ट गोल किपर, रौतहटकी समीक्षा घिमिरे उत्कृष्ट डिफेन्डर, रौतहटकै इशा रानामगर उत्कृष्ट मिड फिल्डर र धनगढीकी ममता पुनमगर उत्कृष्ट फर्वाड घोषित भए । यस्तै, धनगढीका सुरज तामाङ उत्कृष्ट प्रशिक्षक बने । उनीहरूले जनही १०–१० हजार रुपैयाँ प्राप्त गरे ।

नारायणगढ लेडी जेसीजको आयोजना तथा चितवन जिल्ला फुटबल संघको प्राविधिक सहयोगमा सम्पन्न प्रतियोगितामा आठ टोली सहभागी थिए ।