काठमाडौँ । गैरआवासीय नेपाली संघ (एनआरएनए)को नेतृत्वका लागि भएको निर्वाचनको नतिजा दुई दिन हुँदा पनि औपचारिकरुपमा सार्वजनिक गरिएको छैन ।

एनआरएनएले औपचारिकरुपमा नतिजामा प्राविधिक त्रुटि भएको विज्ञप्ति सार्वजनिक गरेको छ । तर, के कस्ता समस्याले नतिजा औपचारिक नगरिएको हो कुनै जानकारी दिएको छैन ।

उपाध्यक्ष पदका उम्मेदवार डा केशव पौडेलको काठमाडौँ केन्द्रबाट हालिएको करिब आठ सय मतमा शून्य आएपछि विवाद सुरू भएको थियो । अध्यक्ष पदका पराजित उम्मेदवारले यो निर्वाचन स्वीकार गर्न नसक्ने बताएका छन् ।

पहिले पराजित भएका भनिएका डा. पौडेल भने विजयी भएको अनौपचारिकरुपमा सार्वजनिक गरिएको छ । केशवको स्पेलिङ फरक परेकाले शून्य मत देखिएको बताइएको छ । यो पनि औपचारिक जानकारी भने होइन ।

विवादका कारण शपथ ग्रहण र नेतृत्व हस्तान्तरण पनि रोकिएको छ । अध्यक्षमा जितेका डा. बद्री केसी र उनको समूह शपथ लिन तयार भए पनि निर्वाचन कमिटीले अनलाइन भोटको जिम्मेवारी लिएको भेरो कम्पनीबाट पूर्ण जानकारी नआई अन्तिम नतिजा नदिने बताएपछि शपथ रोकिएको हो ।

निर्वाचन कमिटीले छानबिनका लागि १५ दिनको समय मागेको बताइएको छ । डा केसी भने यसको पक्षमा थिएनन् । निर्वाचनमा आएको विवादले एनआरएनएको साख भने गिराएको छ । अमेरिकामा पनि अनलाइनमार्फत निर्वाचन हुँदा निर्वाचन कमिटीले विवादका कारण नतिजा सार्वजनिक गर्न ढिलाई गरेको थियो ।

स्मार्ट एनआरएनए बनाउन अनलाइन भोटिङ प्रणाली अवलम्वन गरिएको थियो । यसले झन विवाद सृजना गरेको हो ।

नवगठित एनआरएनएको समानान्तर समितिका पदाधिकारीद्वारा पद बहाली