काठमाडौं । आईसीसी विश्वकप क्रिकेट लिग–२ मा मंगलबार नामिबियाविरुद्ध ऐतिहासिक जित निकाल्दा शतक प्रहार गरेपछि नेपाली टिमका ओपनर ब्याटर कुशल भुर्तेलले यो आफ्नो कठिन मेहनतको परिणाम भएको प्रतिक्रिया दिए ।

लिग–२ अन्तर्गत त्रिदेशीय श्रृंखलाको पहिलो खेलमा नेपालले नामिबियाविरुद्ध दुई विकेटको जित निकालेको थियो । कीर्तिपुरस्थित त्रिवि क्रिकेट मैदानमा सम्पन्न खेलमा नामिबियाले प्रस्तुत गरेको २८६ रनको लक्ष्य नेपालले ४७.४ ओभरमा आठ विकेट गुमाएर पूरा गर्यो । नामिबियाविरुद्ध नेपालले भेट्टाएको यो लक्ष्य नेपाली क्रिकेटको इतिहासमा अहिलेसम्मकै ठूलो योगफल हो ।

खेलपछिको पत्रकार सम्मेलनमा बीचमा प्रदर्शन केही खस्किएर पुनः लयमा फर्किँदा कस्तो महसुस हुँदै छ ? भन्ने प्रश्नमा उनले आफूले आफ्नो जीवनको उच्च र न्यून विन्दुमा खास ध्यान नदिएको बताए ।

“त्यसमा मैले धेरै सोचेको थिइनँ । मेरो पछाडि कठिन मेहनत छ, त्यसले कुनै दिन परिणाम दिनेछ भन्ने विश्वास थियो । कहिले कठिन अवस्था आइहाल्छ नि । त्यसमा खास ध्यान दिएको थिइनँ । आफ्नो कार्य गरिरहेको थिएँ,” कुशलले भने ।

“खुसी छु । पहिलोपटक एकदिवसीय क्रिकेटमा शतक प्रहार गर्दा पक्कै पनि खुसी लागिहाल्छ । तर, टिमले ठूलो लक्ष्य भेट्टायो, त्यसमा धेरै खुसी छु । अबका १२ खेलमा के के गर्ने भनेर योजना बनाएका थियौं, त्यहीअनुरुप आजको खेल भयो । ओपनिङ गर्नमा नै म आत्मविश्वासी महसुस गर्छु । प्रशिक्षकले भूमिका दिनुभयो । त्यसमा स्कोर बनाउन सफल भए,” कुशलले भने, “शतक प्रहार गर्दा पनि टिमले जितिसकेको थिएन । एक सेट ब्याटरको रुपमा टिमलाई जितसम्म लग्नुपर्ने मेरो जिम्मेवारी थियो । आउट भएँ, त्यसकारण त्यति खुसी पनि भइन् । टिमलाई जितसम्म डोहोर्याउन सकेको भए अझ धेरै खुसी हुने थिएँ । एक–दुईओटा साझेदारीले खेललाई नतिजासम्म पूर्याउन सक्छौँ भन्ने थियो । रोहित र मेरो साझेदारी बन्यो पनि । टिममा सबै सकारात्मक छन् । सबैले एक अर्कालाई सर्पोट गरिरहेका छन् । स्यान्डी कतिपछि आयो, उसलाई पनि टिमले सर्पोट गरिरहेको छ । खेलमा जे भए पनि प्रशिक्षकले खेलाडीलाई सकारात्मक राखिरहनुभएको छ । १२खरीबाट