चितवन । चितवनको रत्ननगर-८, मोहना घर भई अमेरिकाको टेक्सस बस्दै आएका समाजसेवी एवं युलेस सिटी काउन्सिल मेम्बर टीका पौडेललाई पितृशोक परेको छ । उनका बुबा प्रेमप्रसाद पौडेलको ८६ वर्षको उमेरमा बुधबार चितवनस्थित आफ्नै निवासमा निधन भएको हो ।

स्वर्गीय प्रेमप्रसाद पौडेलका श्रीमती कौशिका पौडेल, छ छोरा र तीन छोरी रहेका छन् । टीका पौडेल माइलो छोरा हुन् । उनी बुबाको स्वास्थ्य र हेरविचारका लागि केही दिनदेखि नेपालस्थित घरमै रहेका थिए ।

स्वर्गीय प्रेमप्रसाद पौडेलको बुधबार बेलुका हिन्दु संस्कारअनुसार देवघाटमा दाहसंस्कार गरिएको छ । पौडेल परिवारमा परेको शोकप्रति युलेस सिटी काउन्सिल पदाधिकारीलगायतले गहिरो दुःख व्यक्त गरेका छन् ।

हिमालयखबरका शुभचिन्तक टीका पौडेलको परिवारमा परेको शोकप्रति हिमालय खबरका प्रबन्ध सम्पादक विकासराज न्यौपानेलगायत सिंगो टिमले गहिरो दुःख व्यक्त गर्दै दिवगंत आत्माको चिरशान्तिको कामना गर्दै हार्दिक श्रद्धाञ्जली अर्पण गरेको छ । साथै, शोकाकुल परिवारजनमा धर्यधारण गर्न सक्ने शक्ति मिलोस् भन्ने कामना गर्दै हार्दिक समवेदना प्रकट गरिएको छ ।