काठमाडौँ । राष्ट्रिय स्वतन्त्र पार्टी (रास्वपा)का मन्त्रीहरूले आइतबार राजीनामा बुझाएका छन् । पार्टीले आइतबार सरकारबाट बाहिरिने निर्णय गरेपछि रास्वपाका तीन जना मन्त्रीले राजीनामा दिएका हुन् ।

शिक्षामन्त्री शिशिर खनाल, श्रममन्त्री डोलप्रसाद अर्याल र स्वास्थ्य राज्यमन्त्री तोसिमा कार्कीले प्रधानमन्त्री पुष्पकमल दाहाल प्रचण्डलाई राजीनामा बुझाएका हुन् । उनीहरूले आइतबार साँझ बालुवाटार पुगेर राजीनामा बुझाएका हुन् ।

गृह मन्त्रालय नपाएपछि रवि लामिछाने नेतृत्वको पार्टीले सरकारबाट बाहिरिने निर्णय गरेको थियो । यद्यपि सरकारलाई दिएको समर्थन भने यथावत रहने सभापति लामिछानेले पत्रकार सम्मेलनमा बताएका छन् ।

नागरिकता विवादसम्बन्धी मुद्दामा सर्वोच्च अदालतले लामिछानेको सांसद् र मन्त्री पदबाट बर्खास्त गरेको थियो । लामिछानेले नागरिकता पुनःप्राप्ति गरे पनि प्रधानमन्त्री प्रचण्डले स्वार्थ बाझिने भन्दै रास्वपालाई गृह मन्त्रालय दिन तयार नभएपछि सो पार्टीले सरकारबाट बाहिरिने निर्णय गरेको हो ।