चितवन । गैँडाको खाग तस्करी गरेको आरोपमा १५ वर्ष जेल जीवन बसेर रिहा भई पुनः गैँडा तस्करीमा लागेका चितवनको कालिका नगरपालिका वडा नं–९ बस्ने ४३ वर्षीय बमबहादुर प्रजा प्रहरीको फन्दामा परेका छन् । 

 

बमबहादुर प्रजा २०६० देखि २०७५ सम्म १५ वर्ष जेल बसेर छुटेका अभियुक्त हुन् । उनीमाथि १७ वटा गैँडा मारेको आरोप प्रमाणित भएको थियो । जुन उनले नै स्वीकार गरेका थिए । प्रजालाई बिहीबार धादिङको जिल्ला प्रहरी कार्यालय धादिङको सहयोगमा नेपाल सेनासहितको केन्द्रीय अनुसन्धान ब्यूरो (सिआइबी)ले बेनीघाट नगरपालिका–३, मलेखुबाट पक्राउ गरिएको सिआइबी प्रमुख उत्तम सुवेदीले जानकारी दिए । 

 

निकुञ्जको अनुसन्धानबाट पछिल्लो समय २०७७ कात्तिकमा बमबहादुरले चारवटा गैँडा मारेको चितवन राष्ट्रिय निकुञ्जका सूचना अधिकारी गणेशप्रसाद तिवारीले जानकारी दिए । आरोपित प्रजाले निकुञ्जको घाँघर क्षेत्र, बहापुर, भोरघाट र मर्दिघोल क्षेत्रमा गैँडाको चारीसिकार गरेको निकुञ्जले जनाएको छ ।

गत असार १३ गते पक्राउ परेका चारवटा गैँडा मारी खाग तस्करी गरेको आरोप लागेका अर्का आरोपित रामकुमार प्रजा र बमबहादुरलाई थप अनुसन्धान र कानुनी कारबाहीका लागि केन्द्रीय अनुसन्धान ब्यूरोले निकुञ्जलाई बुझाएको छ । आरोपितहरुलाई जिल्ला अदालत चितवनमा उपस्थित गराइने निकुञ्जको कार्यालयले जनाएको छ ।

 

यसअघि गैँडा मारेर खाग तस्करी गरेको अभियोगमा रामकुमार प्रजा १० वर्ष जेल बसेर छुटेका हुन् । उनी २०६० देखि २०७० सम्म जेल बसेर रिहा भएका थिए । जेलबाट छुट्नासाथ उनीहरु फेरि गैँडाको खाग बेच्ने धन्दामा सक्रिय भएको अनुसन्धानबाट थाहा भएको निकुञ्जका सूचना अधिकारी गणेशप्रसाद तिवारीले जानकारी दिए ।

 

प्रहरीले रामकुमार प्रजाको भाइ कुख्यात गैँडा तस्कर राजकुमारलाई प्रहरीले २०७१ मा मलेसियाबाट पक्राउ गरेर नेपाल ल्याएको थियो । राजकुमारले २८ वटा गैँडा मारेको कसुरमा जिल्ला कारागार चितवनमा कैद भुक्तान गरिरहेका छन् ।