प्रवास / विश्व

रेष्टुरेन्टहरुमा ग्राहक बढाउन सेलिब्रेटी ल्याउने क्रम तीब्र

प्रकाशित |
ड्यालस (टेक्सस) । अमेरिकाको ड्यालसमा नेपाली–अमेरिकनहरुद्वारा सञ्चालनमा आएका रेष्टुरेन्टहरुले ग्राहकहरुलाई आकर्षित गर्न नेपालबाट सेबिब्रेटीहरु ल्याउने क्रम बढेको छ ।
 
ग्राहकलाई मनोरञ्जन सहित खानाको स्वाद चखाउने क्रममा रेष्टुरेन्ट सञ्चालकहरुले सेलिब्रेटीहरु झिकाएर कार्यक्रम समेत गर्ने क्रम केही समय यता बढ्दै गएको छ । हालैमात्र अर्भिङमा आफ्नो तेस्रो आउटलेट खोलेको नाङ्ग्लो ग्रुपले आउँदो सप्ताहन्त अहिलेका दुई चर्चित सेलिब्रेटीहरुलाई ल्याउने भएको छ ।
 
रेष्टुरेन्टका मेनेजर कविन्द्र सिंहले दिएको जानकारी अनुसार आउँदो शनिबार (मे २८ तारिक) नायिकाद्वय केकी अधिकारी र रिमा विश्वकर्मालाई ल्याइदैछ । ‘उहाँहरुका साथमा स्थानीय मुरली ब्याण्डको प्रस्तुती र लाइभ कन्सर्ट समेत हुँदैछ’ सिंहले भने । प्रवेश निशुल्क गरिएको यो कार्यक्रमले समर छुट्टीको क्रममा नेपाली विद्यार्थीहरुलाई रमाइलो वातावरण प्रदान गर्ने लक्ष्य आयोजकको छ । 
 
भरखरैमात्र वैवाहिक जीवनमा प्रवेश गरेकी नायिका केकी कार्यक्रममको सिलसिलामा अमेरिका आएकी हुन् । उनीसँगै आएकी अर्की नायिका रिमाको यसै साता नेपाल फर्किने टिकट भएपनि विशेष अनुरोध गरेर ड्यालस ल्याउन लागिएको नाङ्ग्लो ग्रुपले जनाएको छ । 
 
नाङ्ग्लोले हरेक महिना जस्तो नेपालबाट आएको सेलिब्रेटीहरुलाई ल्याएर ‘मिट दी ग्रेट’ सहितको माहौल गर्दै आएको छ । यसैक्रममा गायक एसकुमार, बाबु बोगटी लगायतले आफ्नो प्रस्तुति दिइसकेका छन् ।
 
त्यस्तै गतवर्षदेखि युलेसमा सञ्चालनमा आएको ठमेल बियर गार्डेन रेष्टुराले पनि नेपालकी चर्चित सेलिब्रेटी तथा पूर्ब मिस नेपाल श्रृङ्खला खतिवडालाई ल्याउँदैछ । आउँदो जुन ४ तारिक शनिबार खतिवडाका साथमा विविध कार्यक्रम गर्न लागिएको रेष्टुँराका मेनेजर राजेन्द्र सुवेदीले जानकारी दिए । 
 
जुन ४ तारिक साँझ ५ बजेदेखि कार्यक्रम सुरु हुने जनाइएको छ । 
 
खतिवडा सन् २०१८ की मिस नेपाल हुन् । उनी हाल अमेरिकाकै म्यासाचुसेट राज्यको हार्भर्ड युनिभर्सिटीमा अध्ययनरत छिन् । पेशाले उनी इन्जिनियर हुन् । 
 
ग्राहकलाई नेपाली स्वादका खानेकुरासँगै मनोरञ्जन समेत प्रदान गर्ने उद्वेश्यले सेलिब्रेटी ल्याउने क्रम केही महिना यता तीब्र भएको छ । कोरोनाका कारण दुईवर्षसम्म शिथिल भएको रेष्टुरेन्ट व्यबसायले पछिल्ला केही महिनामा फड्को मारेको छ । 
 
कोरोनाकालमा निकै राम्रो चलेको बेडफोर्डको फिस्टेल रेष्टुरा पुरै बन्द भएको छ ।


हिमालयखवर संवाददाता

हिमालयखवर संवाददाता -

थप »

यो खबर पढेर तपाईलाई कस्तो महसुस भयो ?

प्रतिक्रिया