विन्टरमा न्यूयोर्कमा हिमपात हुनु सामान्य मानिन्छ । तर जब अमेरिकाको तराईका रुपमा लिइने टेक्सस, लुजियाना, अलाबामा, न्यू–मेक्सिको, एरिजोना लगायतका राज्यहरुमा हिमपात हुन्छ तब अमेरिकाभरि ठूलो समाचारको विषय हुन्छ ।
यसपटक पनि त्यस्तै भएको छ । पूर्बोत्तर अमेरिकाको मेनराज्यदेखि लिएर टेक्सससम्म एकैपटक भारी हिमपात भएको छ । विन्टरमै पनि त्यति हिउँ नपर्ने टेक्ससमा यसपटक कम्तिमा एकदेखि तीन इन्चसम्म हिउँ परेको छ । बुधबार रातिदेखि पर्न सुरु भएको हिमपातले टेक्ससको जनजीवन प्रभावित पारेको छ ।
अधिकांश युनिभर्सिटी, कलेज, स्कुलहरु बन्द भएका छन् । हिउँमात्र होइन माइनस तापक्रमभन्दा तल झरेपछि बालुवाको कण जसरी झर्ने पानीले सडकमा गाडी चलाउन जोखिम बढाएको छ । जसले गर्दा मानिसहरुलाई घरमै रहन र न्यानो वातावरणमा बस्न संबन्धित काउन्टी, सिटीहरुले विशेष आदेश जारी गरेका छन् ।
विरलै हिउँ पर्ने ठाउँमा व्यापक हिमपात भएपछि घर बाहिर निस्किएर खेल्नेहरु अत्यधिक देखिन्छन् । हिममानवको आकृति बनाएर त्यसलाई सिगार्ने, एक आपसमा हिउँ खेलेर सामाजीक सञ्जालमा पोष्ट गर्नेहरु धेरै देखिएका छन् ।
गत वर्षको फेब्रुअरी तेस्रो साता पनि टेक्सस राज्यभरि भीषण हिमापात भएको थियो । जसले गर्दा लाखौ घरहरुमा बिजुली गएको थियो । टेक्ससको पावर ग्रीड फेल भएको विषय अहिलेसम्म पनि आलोचनाको विषय भैरहेको छ । यसपटक पनि ग्रेपभाइन, अस्टिन, ड्यालस लगायतका सिटीहरुमा बिजुली गएको छ ।
ड्यालसको तापक्रम माइनस चार डिग्री सेल्सियस (२४ डिग्री फरेनहाइट) मा झरेको छ । मानिसहरु घरमै बसेर आनन्द लिइरहेका छन् । चिसो बढ्ने र हिमपात हुने पूर्वानुमान पछि वालमार्ट, क्रोगर, अल्दी जस्ता स्टोरहरुमा बुधबारदेखिनै सामानहरु रित्तिएका थिए । मानिसहरुले आवश्यक भन्दा बढी सामान किनेर होल्ड गर्ने प्रवृत्ति देखिएको छ ।
प्रतिक्रिया