ड्यालस (टेक्सस) – नेपाली समाज टेक्सस (एनएसटी) को आज आइतबार भएको चुनावी कार्यक्रम यो समाचार तयार पार्दासम्म निकै शान्तिपूर्ण रुपमा सम्पन्न भइरहेको छ ।
करिब ३ हजार ८ सय सदस्य रहेको समाजको चुनावी प्रकृया अन्तरगत मतदान कार्यक्रममा अहिलेसम्म १ हजार ९ सय जनाले मतदान गरिसकेका छन् । लगभग दुईहजार मतदान हुने अनुमान गरिएको छ।
समाजको अध्यक्षका लागि पूर्ब उपाध्यक्ष कमल सापकोटा र वर्तमान वरिष्ठ उपाध्यक्ष राजेन्द्र वाग्लेबीच निकै तीब्र प्रतिस्पर्धा रहेको छ । हिमालयखबरले मतदान स्थल अर्भिङस्थित करिलिफ रेष्टुराँमा मतदानका लागि आएका सहभागीबीच लिएको सर्वेक्षणमा अध्यक्षमा निकै प्रतिस्पर्धा रहेको र पदाधिकारीहरुमा मिश्रीत परिणाम आउने संकेत देखिएको छ ।
दुबै पक्ष प्यानल खडा गरेर चुनावी प्रतिस्पर्धामा रहेतापनि दुबै मतदाताहरुले प्यानलभन्दा व्यक्तिगत मूल्यांकनमा आधारमा मतदात गरेको प्रतिकृया दिएका छन् । आफैंले शुल्क तिरेर सदस्य बनेका अधिकांशले उम्मेदवारहरुको विगतको योगदानलाई हेरेर मत दिएको समेत बताए ।
बिहान ९ बजे सुरु भएको मतदानको सुरुको केही समय गैर सदस्यहरु प्रवेश गरेर प्रभाव पार्न खोजेको गुनासो परेपछि निर्वाचन समितिले तुरुन्तै त्यसलाई समाधान गरेर उम्मेदवारहरुलाई भित्र प्रवेश गर्न सिमित गरेको थियो । मतदान गर्न आएका व्यक्तिहरुले आफ्नो नाम फेला नपारेको गुनासो पनि गरेका थिए ।
मतदानको लागि साँझ ७ बजेसम्मको समय तोकिएको छ । ‘७ बजेभित्र चुनाव हुने हलभित्र प्रवेश गरिसक्नुपर्नेछ । त्यसपछि कोही पनि पस्न पाउँदैनन्’ प्रमुख निर्वाचन अधिकृत डा. प्रेम अधिकारीले भने । मतदात सकिएको एक घण्टापछि नै मतगणना सुरु गर्ने लक्ष्य निर्वाचन समितिको छ ।
‘मतगणनाको लागि १० ठाउँमा गरिनेछ । लगभग चारघण्टामा परिणाम सार्वजनिक गर्ने तयारीमा समिति रहेको छ’ डा. अधिकारीले भने ।
प्रतिक्रिया