ह्युस्टन । विगत केही वर्षदेखि स्वदेश तथा विदेशमा नेपाली खाना – परिकारको प्रवर्धनमा सक्रिय सुरेश बस्नेत हाल ह्युस्टन आएका छन् । उनले ग्यास्ट्रोनोमि टूर नेपाल ( Gastronome Tour De Nepal ) नामक कार्यक्रम मार्फत नेपाली परिकारको प्रबर्धन गर्ने र विदेशमा लामो समयदेखि होटल रेष्टुराँमा काम गर्ने सेफहरुलाई सम्मान गर्ने योजना बोकेर हिडेका छन् ।
यसै क्रममा उनले आगामी नोभेम्बर ७ आइतबारका दिन ह्युस्टनको बार्कर साइप्रस रोड स्थित विकास अधिकारीको अमर इण्डियन कुजिनमा नेपाली खाना र संस्कृति २०२१ नामक उत्सव आयोजना गरेको हिमालय खबरलाई बताए । सो कार्यक्रममा विभिन्न नेपाली परिकारको स्वाद पस्किने र ह्युस्टनमा रहेका पुराना स्थापित नेपाली सेफहरुलाई सम्मान गरिने जानकारी दिए ।
फूड गुरु सुरेश बस्नेत
” नेपाली फूड गुरु ” टिभी सो मार्फत सुरेश बस्नेतले नेपाली खानाको व्यापक प्रबर्धन गरेका छन् । त्यसबाहेक नेपाली खाना र यहाँको पर्यटन प्रवर्धनमा नेपाल पर्यटन बोर्डसँगको समन्वयमा कोरिया र अस्ट्रेलियामा काम पनि गरेका छन् । त्यसैगरी चिनमा उनकै सक्रियतामा नेपाली खाना प्रवर्धनमा विशेष कार्यक्रम समेत आयोजना भएको थियो । उनै फूड गुरु बस्नेतले ह्युस्टनमा विभिन्न नेपाली खाना परिकार चखाएर नेपाली स्वादको प्रबर्धन गर्दैछन् । ह्युस्टन पछि न्यूयोर्कमा पनि यस्तै कार्यक्रम गर्ने उनले बताए ।
प्रतिक्रिया