नयाँदिल्ली । मुख्य निर्वाचन आयुक्त ज्ञानेश कुमारविरुद्धको विरोध प्रदर्शनका बीच विपक्ष पछि नहट्ने कुरामा जोड दिँदै लोकसभाका विपक्षी नेता राहुल गान्धीले शनिबार प्रधानमन्त्री नरेन्द्र मोदीलाई सबै प्रदर्शनकारीहरूलाई गिरफ्तार गर्न चुनौती दिएका छन् ।

उनीहरूले संविधानको रक्षा तथा भारतीय जनताको आवाजको सुरक्षाका लागि आफ्नो सङ्घर्ष जारी राख्ने उनले दाबी गरे । उनले प्रदर्शनरत युवाहरूप्रति एकता कायम गर्न आग्रह गर्दै उनीहरूलाई आफ्नो प्रदर्शन जारी राख्न आग्रह गरे ।

एक्समा एक पोस्टमा गान्धीले आफू एक दशकभन्दा बढी समयदेखि प्रधानमन्त्री मोदी र आरएसएसविरुद्ध लडिरहेको बताउँदै आफ्ना राजनीतिक विरोधीहरूलाई ‘भित्रसम्म’ बुझेको दाबीसमेत गरे ।

गान्धीले भने, “म एक दशकभन्दा बढी समयदेखि नरेन्द्र मोदी र आरएसएसविरुद्ध लडिरहेको छु। म उनीहरूलाई गहिरोरूपमा बुझ्छु । यी मानिसहरूको मुख्य विशेषता कायरता हो । नरेन्द्र मोदी, अमित शाह, मोहन भागवत, ज्ञानेश कुमार र अजित डोभाल बिस्तारै आफ्नो वरिपरिको ठाउँ साँघुरो हुँदै गएको महसुस गर्दैछन्। हामी त्यो ठाउँ साँघुरो बनाउँदैछौँ । मोदीजी, तपाईं जे चाहनुहुन्छ गर्नुहोस्। सबै प्रहरी बोलाउनुहोस्ः १० हजार, २० हजार, ५० हजार, जति चाहनुहुन्छ। सबै नेताहरूलाई गिरफ्तार गर्नुहोस्। सबै युवालाई गिरफ्तार गर्नुहोस्। हामी सबैलाई गिरफ्तार गर्नुहोस्, तर आन्दोलन जारी रहन्छ ।”

उनले आफ्नो पक्षसँग पहिले नै आवश्यक जानकारी रहेको दाबी गर्दै संविधानको रक्षा र भारतीय जनताको आवाजको सुरक्षा गर्ने प्रतिबद्धता व्यक्त गरे ।

उनले भने, “हामी तपाईंलाई घेर्दैछौँ र हामी पछि हट्ने छैनौँ । मेरो कुरा याद राख्नुहोस्ः हामीसँग पहिले नै आवश्यक जानकारी छ । हामी आफ्नो संविधानको रक्षा गर्नेछौँ। हामी भारतीय जनताको आवाजको सुरक्षा गर्नेछौँ। र, हामी सुनिश्चित गर्नेछौँ कि विगत १०–१५ वर्षमा भारतसँग जे गरियो, त्यो फेरि कहिल्यै हुने छैन ।’

आन्दोलनकारी समूहलाई सम्बोधन गर्दै उनले भने, “भारतका युवाहरू, म तपााईंहरूमाथि गर्व गर्छु । प्रदर्शन जारी राख्नुहोस् । हामी तपाईंहरूसँग उभिएका छौँ। हामी सुनिश्चित गर्नेछौँ कि यो शासन र हाम्रो संविधानमाथि आक्रमण गर्नेहरू पराजित हुनेछन्।”

यसैबीच, मुख्य निर्वाचन आयुक्त ज्ञानेश कुमारको राजीनामा माग गर्दै ककरोच जनता पार्टी (सीजेपी) को नेतृत्वमा जन्तर मन्त्रतर्फ मार्च गर्ने प्रयास गर्दा राजधानी दिल्लीभरि एक हजार भन्दा बढी प्रदर्शनकारीहरूलाई हिरासतमा लिइएको दिल्लीको प्रहरी स्रोतहरूले शनिबार जानकारी दिएका छन् । एएनआई