अमेरिका- काठमाडौ जिल्ला अदालतले हुण्डी र क्रिप्टो कारोवारमा दोषी नभएको ठहर गर्दै दीपेश श्रेष्ठलाई सफाई दिएको छ । दीपेश टेक्ससका सफल व्यवसायी हुन् । अमेरिकामा स्टोर, बैंक लगायत कयौं व्यवसायमा उनका लगानी छ ।

नेपाल प्रहरीको केन्द्रय अनुसन्धान ब्युरो (सिआईबी)ले करिव डेढ वर्ष अघि हुण्डी र क्रिप्टो कारोवारमा संलग्न भएको दावी गर्दै दिपेशका दाई रुपेश श्रेष्ठ सहित १७ जना विरुद्ध मुद्दा दायर गरेको थियो । यस मुद्दामा २ अर्ब ८६ करोड रुपैंया बरावरको विगो मागिएको थियो ।

जिल्ला अदालत काठमाडौंले गत जेठ २७ गते आंशिक ठहरको फैसलामा १० जनालाई दोषी ठहर गरी कैद र जरिवाना तोकेको छ । मुख्य आरोपी रुपेशलाई २१ महिना कैद र १० लाख रुपैंइा जरिवाना तोकिएको जिल्ला अदालतका सूचना अधिकारले वताएका छन् । न्यायाधीश सुमनकुमार न्यौपानेको इजसालवाट यो फैसला भएको हो । रुपेश थुनामा वसेको १९ महिना भईसकेको छ ।

२०८० मंसिर ६ गते सिआइबीले रुपेशलाई झण्डै १ करोड रुपैंया सहित घरवाट पक्राउ गरेको थियो । त्यसवेला उनको मोबाइल र घरमा भेटिएको डायरीवाट हुन्डी र किप्टो कारोबारको संजाल भेटिएको प्रहरीको दावी थियो ।

उक्त मुद्दामा प्रतिवादी बनाईएका दीपेश श्रेष्ठ, अंशुल श्रेष्ठ र रचना शर्माले पनि सफाई पाएका छन् । अंशुल दिपेशका भान्जा र रचना भाउजु हुन् ।

अमेरिकामा व्यवसाय गरेर कमाएको पैसा नेपालमा समेत लगानी गरेका दीपेश यो मुद्दाका कारण निष्कृय जस्तो देखिएका थिए । यो मुद्दामा प्रतिवादी वनाईएका केहीलाई  सम्पत्ति शुद्धीकरण भए नभएका वारेमा भने अनुसन्धान भइरहेको सिआइवी स्रोतले जनाएको छ ।