काठमाडौँ । रुस र युक्रेनबीचको युद्धमा परेका नेपाली नागरिकहरुको उद्धार गर्न राष्ट्रिय मानव अधिकार आयोगले सरकारलाई आग्रह गरेको छ ।

आयोगले आइतबार विज्ञप्ति जारी गर्दै नेपाली नागरिकहरु जहाँ र जुनसुकै अवस्थामा रहे पनि उनीहरुको मानव अधिकार संरक्षण गर्नु सरकारको कर्तव्य भएको भन्दै सरकारको ध्यानाकर्षण गराएको छ ।

‘रुस र युक्रेनबीच भइरहेको युद्धका क्रममा नेपालीहरु विभिन्न गैरकानुनी बाटो प्रयोग गरी रुसी र युक्रनी सेनामा भर्ना भएका र युक्रेनी सेनाको आक्रमणमा परी केही नेपालीको मृत्यु भएको, केही घाइते भएका र अझै पनि सयौंको संख्यामा दुवैतर्फको सेनामा नेपालीहरु संलग्न रहेको बुझिन आएको छ। नेपाली नागरिकहरु जहाँ र जुनसुकै अवस्थामा रहे पनि उनीहरुको मानव अधिकारको संरक्षण र उद्धार गर्नु सरकारको कर्तव्य हुन जान्छ,’ आयोगले भनेको छ।

यस्तै, आयोगले युद्धमा परेर मृत्यु भएकाहरुको शव स्वदेश ल्याई आफ्नो परम्पराअनुसार दाहसंस्कार गर्ने व्यवस्था मिलाउन, घाइतेहरुको उपचारका लागि प्रभावकारी पहल गर्न र स्वदेश फर्कन चाहनेहरुलाई कूटनीतिक पहल गरी स्वदेश फर्काउन सरकारसँग आग्रह गरेको छ।