हिमालयखबर संवाददाता-
ड्यालस (टेक्सस) । तीज पर्व महिलाहरुले दर खाने र महादेवको आरधाना गर्ने पर्वका रुपमा मात्र नभएर विगत केही वर्ष यता नयाँनयाँ गीत निकाल्ने अवसरका रुपमा समेत चिनिन थालेको छ ।

केही वर्ष यता तीज अाउन झण्डै डेढ महिना अघिदेखि तीजको माहौल सुरू हुन थालेको छ । यसरी सुरु हुने तीजको माहौलमा गीतले रौनकता थप्ने हुँदा सर्जक र गायकहरुले यही मेसोमा नयानयाँ गीत निकाल्न थालेका छन् । तीजलाई नयाँ गीत निकाल्ने अवसरका रुपमा सर्जक, गायकहरुले बनाउन थालेका छन् ।

यस वर्ष तीजको सेरोफेरोमा झण्डै एकसय ५० वटा गीतहरु सार्वजनिक भएका छन् । पहिले जस्तो क्यासेट, सिडी निकाल्न समय, ठूलो लगानी गर्न नपर्ने हुँदा युुटूबको माध्यमबाट तीजका नयाँनयाँ गीतहरु सार्वजनिक भएका छन् । नेपाल बाहिर बसेका गीत संगीतका पारखीहरुले समेत तीजको अवसर छोपेर गीत, भिडियो निकालेका छन् ।

चर्चित लोकगायक रामप्रसाद खनाल यतिखेर नेपाल पुगेका छन् । नेपाल पुगेर उनले ‘गाउँ शहर खाली हुन थाले बरै जतानि’ बोलको गीत निकालेका छन् । ‘सांरगी संसार’ युटुब च्यानल र आफ्नै नामको च्यानलबाट सार्वजनिक गरिएको उनको गीत दुबै तिर गरेर सवा दुईलाखले हेरिसकेका छन् ।

गीत संगीतमा रहेको आफ्नो लगावलाई नेपाल आएको समय पारेर तीजको गीत मार्फत सार्वजनिक गरिएको खनालले हिमालय खबरसँग बताए ।

ड्यालसमा रहेर तीजको गीत सिर्जना गर्नेमा लिलु गुरूङ्ग निकै अगाढी छिन् । उनी साहित्यकार पनि हुन् । उनले हरेक वर्ष तीजका गीत लेख्ने गरेकी छिन् ।

गुरूङ्गले यसवर्ष भने ‘यसो मेसो मिलाएर’ बोलको गीत युटुबमा सार्वजनिक गरेकी छिन् । अहिलेसम्म एकलाख १४ हजारले यो गीत हेरिसकेका छन् । गीतको भिडियो अमेरिकामै सुटिङ्ग गरिएको हो । टेक्ससको युलेसमा सुटिङ्ग गरिएको गीतमा स्थानीय कलाकारहरू देख्न सकिन्छ ।

गुरुङ्गले लामो समयदेखि तीजको गीतहरु लेखेर अन्य गायक गायिकालाई दिएपनि गत वर्षदेखि भने आफ्नै युटूब च्यानल मार्फत सार्वजनिक गर्न सुरू गरेकी हुन् । गत वर्ष तीजकै समयमा सार्वजनिक गरिएको ‘चोली पुरानै, साडी पुरानै’ गीतले निकै चर्चा कमाएको थियो ।

‘गीत आफैँले लेख्छु, तर पनि गायक गायिका, भिडियो निकाल्न समेत गर्दा ६/७ हजार डलर खर्च हुन्छ’ उनले भनिन् । अहिले तीजको गीतका नाममा विकृती फैलिएको देख्दा नमिठो लाग्ने उनले बताइन् ।

नेपालमा गीत रेकर्ड भएपनि अमेरिकामा रहेर तीजका गीतहरुको भिडियो बनाउँदै आएका अर्का व्यक्ति हुन् किशन रेग्मी । लामो समयदेखि अमेरिकाको ड्यालसमा बसेर पत्रकारितामा संलग्न रेग्मी गीतकार पनि हुन् ।

रेग्मीको निर्देशन र छायांकनमा तीजका दुइ गीत सार्वजनिक भएका छन् । ‘गम्किदे मादल’ र ‘जोर मादल’ बोलका दुबै गीतको छायाँकन टेक्ससको ड्यालसमा भएका हुन् ।

‘यी दुबै गीतको गीतकार, गायक गायिकलाई भुक्तानी लगायत सबै खर्च हाम्रो टीमले व्यहोरेर बनाएका हौ’ निर्माता मध्यका एक रेग्मीले हिमालयखबरसँग भने । भिडियोको लागि राष्ट्रिय रुपमा चर्चा कमाएका कलाकार नभै अमेरिकाको ड्यालसमा बस्ने कलाकारहरुलाई साथमा लिइएको छ । राष्ट्रिय कलाकारहरुको प्रयोग नगरेपनि अहिलेसम्मको अवस्थामा युटुबमा भ्युज हेर्दा निकै सन्तुष्ट छौ हाम्रो टीम रेग्मीले भने ।

गम्किदे मादल’को गायिका एलिना चौहान हुन् । उनी अष्ट्रेलियामा भएको समयमा त्यही गीत रेकर्ड गरिएको हो । ‘जोर मादल’मा भने रचना रिमालले स्वर दिएकी छिन् ।

यो गीतको भिडियोमा सबै डयालसका स्थानीय कलकारहरुले अभिनय गरेका छन् । आइशा ओझाको कोरियोग्राफी, मनोज धिताल र राजीब आचार्यको छायांकन रहेको गीतमा स्थानीय कलाकारहरु सरला खरेल, सञ्ज’ घिमिरे, स्वस्तिका घिमिरे, मिन’ ढकाल, हेमा कुबर लगायतले अभिनय गरेका छन् ।

ड्यालसबाटै ‘छमछम नाचौ बरिलै’ बोलको तीजको अर्को गीत पनि उत्पादन भएको छ । ‘वास्तवमा यो गीतको रचना मेरी आमा सरला चापागाईले गर्नुभएको हो । मैले गीतको अडियो, भिडियोको लागि आवश्यक रकम चाँही मैले खर्च गरेको हो’ छमछम नाचौ बरिलैकी निर्मात्री समिक्षा दाहालले भनिन् । झण्डै दुइ दशकदेखि अमेरिका बसेर साहित्यमा दाहाल निकै सकृय छिन् ।

अहिलेको बजारमा तीजका नाममा छाडा गीत बढी चल्ने देखियो । तर पनि अहिलेसम्म हाम्रो गीतलाई एकलाख ७८ हजार हेरिसक्नुभएको छ । यो हिसाबले हामी खुशी नै छौ दाहालले भनिन् ।

अमेरिकाबाट तीजको गीत संगितमा योगदान दिने अर्का व्यक्ति हुन् अशोक अर्याल । अर्यालले ‘अमेरिकामा घर छ’ बोलको गीत शान्तिश्री परियारसँग मिलेर गाएका छन् । यो गीतको दुइलाख ४७ हजार भ्युज नाघिसकेको छ ।

एनआरएन अमेरिकाकी पुर्ब उपाध्यक्ष राधा पौडेलले पनि तीजको गीत सार्वजनिक गर्ने तयारी गरेकी छिन् । मंगलबार मात्र फेसबुक मार्फत उनले ‘शीरफूलको चल्ती हरायो’ बोलको गीत ल्याउन लागेको जानकारी दिएकी छिन् ।

प्रवासमा सबैभन्दा लामो समयसम्म मनाउने पर्वका रुपमा तीज चिनिदै गएको छ । तीजको भोज र त्यो सँगसैगै हुने नाचगानमा अरु गीत भन्दा चेलीबेटी, माइती, आमा, सासुको कचकचलाई विषयवस्तु बनाइएको हुन्छ। त्यसो हुँदा यस्ता गीत बाहिर ल्याउन तीजमै मौसम कुर्ने गरिएको छ ।

बर्षेनी तीजको सन्दर्भ पारेर सयौ गीतहरु सार्वजनिक हुन्छन् । तर चेलीलाई तीज आएको भाव दिलाउने गीत भने चेतन कार्कीले तीन दशक अघि लेखेको ‘तीजको लहर आयो बरिलै’ अझै पनि त्यत्तिकै ताजा छ । चार वर्ष अघि दुर्गेश थापाले गाएको ‘हामी पनि नाच्नुपर्छ बीच्च बीच्चमा’ ले अलग्गै धार समातेको थियो । प्रवासबाट रचिएका,लगानी गरिएका तीजका गीतहरु छाडा र उत्ताउला नभएकोले प्रवासीहरुले भाषा, संस्कार, संस्कृति जोगाउन खेलेको भूमिका प्रति प्रशंसा भैरहेको छ । प्रवासबाट हुने सिर्जनाहरू छाडा शव्दले भरेर चाँडै हिट बनाउने र युटूबबाट मनीटाइज गर्ने भन्दा पनि नेपाली भाषा संस्कृति प्रति मायाँ गरेर हुने कारणले विशिष्ट महत्व बोकेका हुन्छन् ।