ड्यालस (टेक्सस) । ड्यालसको सेरोफेरोमा बस्ने झण्डै १५ हजार नेपाली परिवारमध्य कम्तिमा ८० प्रतिशतको बार्षिक आम्दानी एकलाख डलर छ । मासिक आय एकलाख डलर भएकाहरुको संख्यानै औंलामा गन्न सकिँदैन । सूचना प्रविधि क्षेत्रमा तीनवटा जागिर भएका देखि लिएर दर्जनौ व्यबसाय भएकाहरु धेरै छन् ।

तर यी सबैलाई उछिन्दै एक नेपाली दम्पत्तिले पहिलो पटक युलेसमा निर्माणाधिन पशुपतिनाथ मन्दिर तथा बुद्ध स्तुपाका लागि एकलाख डलर भन्दा धेरै सहयोग गरेका छन् । उनीहरुले एकलाख एकहजार एकसय ११ डलरको प्रतिवद्धता जनाएको छोटो समयमै सबै रकम तिरेर मन्दिरको सर्बोच्च सम्मान ‘वाल अफ अनर’ प्राप्त गरेका छन् ।

टेक्ससको ड्यालस फोर्टवर्थ मेट्रोप्लेक्स अन्तरगत ह्वाइट सेटलमेन्टमा बसोबास गर्दै आएका शैलेन्द्र मानन्धर र उनकी पत्नी रमिता श्रेष्ठ मानन्धरले युलेसमा निर्माणाधिन मन्दिरका लागि सबैभन्दा पहिला एकलाख एकहजार एकसय ११ डलर चुक्ता गरेका छन् । ग्याँस स्टेशन, लिकर स्टोर, रियल स्टेट लगायतका व्यबसायमा संलग्न मानन्धर एकलाख डलर मात्र तिरेका छैनन् । हरेक हप्ता मन्दिरमा स्वयम्सेवा लगायत परिआएको जुनसुकै काममा पनि त्यत्तिकै खटिन्छन् । सदा हँसिलो अनुसार र उनको टिपिकल बोल्ने शैली (लवज) ले गर्दा धेरैले मन पराउँछन् ।

‘मैले दिएको एकलाख डलर नाघिसकेछ है ? त्यति धेरै रकम दिएको जस्तो लागेकै छैन’ उनले ठट्यौली पारामा भने ।

सुरुमा १० हजार डलर तिरेर ट्रष्टी सदस्य बन्ने बेलासम्म के हो ? के हो ? मन्दिर नबन्ने हो कि भन्ने डर उनमा थियो । तर अर्भिङ्को मन्दिर र अहिले युलेसमा भव्य ठाउँमा सरिसकेपछि उनलाई हरेक पटक मन्दिर आउँदा दिउँदिउँ, अझै थपौँथपौँ भन्ने लागिरहने कुरा उनी बताउँछन् ।

‘मन्दिरलाई एकलाख दिइसकेछु, अहिलेसम्म मेरो पैसा घटे जस्तो लाग्दै लाग्दैन । बरु बढेबढे जस्तो पो लागिराखेको छ’ उनले हिमालयखबरसँग भने । हप्तामा कम्तिमा ५ दिन उनी मन्दिरमा आइपुग्छन् । परिआएको जे सुकै काममा पनि उनी मनैदेखि खटिएका हुन्छन् ।

उनी भगवान प्रति अगाध आस्था राख्छन् । नेपालबाट आउँदा रित्तो हात आएको र अहिले व्यबसायमा सफल हुनुमा आफ्नो मेहनतका साथै भगवानको कृपा रहेको बताउँछन् ।

सन् १९९९ मा अमेरिका आएका शैलेन्द्र अहिले टेक्ससकै सफल व्यबसायी मध्यमा पर्छन् । ‘आउँदा खाली हात यो धर्तीमा आएको हो हामी सबै । कमाएको मध्य केही रकम यस्तो पवित्र ठाउँमा दिन पाउँदा मन खुशी हुन्छ’ उनी भन्छन् । अन्य धर्मावलम्बीहरुले आफ्नो आम्दानीको निश्चित अंश धार्मिक एवं सामाजीक कार्यमा लगाउनै पर्ने व्यबस्था हुन्छ । तर हिन्दु धर्ममा भने त्यस्तो व्यबस्था छैन । त्यसैले दान भन्ने कुरा हिन्दुधर्ममा स्वच्छामा आधारित छ ।

मन्दिरलाई एकलाख डलरको प्रतिवद्धता स्थानीय दुई चर्चित व्यबसायीहरुले पनि गरिसकेका छन् । व्यबसायीहरु कृष्णप्रसाद पन्त र विकल ढकालले एकलाख डलरको प्रतिवद्धता जनाएका छन् । एकलाख डलर सहयोग गर्नेलाई मन्दिरले ‘वाल अफ अनर’ ले सम्मान गर्ने नीति लिएको छ ।

युलेसमा पशुपतिनाथ मन्दिर तथा बुद्ध स्तुपा निर्माणको पहिलो चरण सकिएको छ । अब दोस्रो र तेस्रो चरणका मुख्य संरचनाका लागि ५० लाख डलर लाग्ने अनुमान गरिएको छ । यसका लागि नेपाली समुदायका हरेक परिवारलाई समेट्नेगरि नीति तथा कार्यक्रमहरु अघि बढाइएको मन्दिरका उपाध्यक्ष छवीमणि चापागाईले चर्चा गरे । कार्यक्रम अनुसार सदस्यता विस्तार र आउँदो अप्रिल महिनामा नौ दिने नवाह सञ्चालन गर्ने गरि अहिलेलाई मन्दिर केन्द्रित भएको छ ।

अहिलेसम्म मन्दिरका लागि एकहजार एकसय ९७ परिवारले आफ्नो पसिनाको कमाई सहयोग गरेका छन् । यी मध्य ५० हजार सहयोग गरेर प्याट्रोन बन्नेहरुको संख्या १७ छ । त्यस्तै तीनहजार पाँचसय सहयोग गरेर संस्थापक सदस्य हुनेको संख्या सबैभनदा धेरै ९ सय ६० रहेको छ । ट्रष्टी सदस्यहरुको संख्या एकसय ९० छ ।

‘हाम्रो ड्यालस फोर्टवर्थको वरिपरि बस्ने नेपाली परिवार सबैले तीनहजार पाँचसय तिरेर संस्थापक सदस्य बनिदिने हो भने हामीले सोचे अनुसारको भव्य पशुपतिनाथ मन्दिर र बुद्ध स्तुपा बनाउन कुनै गाह्रो काम होइन’ मानन्धरले भने । नेपालकै जस्तो पशुपतिनाथ मन्दिर र ठूलो गुम्बज सहितको जहाँ सयौँ मानिसहरु ध्यान गर्न मिल्छ त्यस्तो खालको स्तुपा बनाउने योजनामा मन्दिर व्यबस्थापन समिति छ । अमेरिकामा भरिकै नेपाली समुदायले बनाएको उत्कृष्ठ धामको रुपमा विकास गर्ने लक्ष्यमा समिति छ ।

‘सबैले मन्दिरलाई सहयोग गरिदिनुस् । तीनहजार पाँचसय तिरेर मन्दिरको सदस्यता लिँदा तपाईहरु सबैलाई आनन्दको महसुस हुन्छ, गर्व पनि लाग्छ । खाली हात यहाँ जन्मियौँ,  रित्तै जाने हो । मन्दिरमा दिएको दानले सन्तुष्टी त मिल्छ’ उनले भने–‘हाम्रो मन्दिर बनाउन नत अमेरिकी सरकार, नत नेपाल सरकारले बजेट दिन्छ, यो हामीले आफूआफूमा मिलेर उठाएरै बनाउनुपर्छ ।’