काठमाडौँ । राष्ट्रिय प्रजातन्त्र पार्टी (राप्रपा) ले बाग्मती प्रदेश संसदीय दलका नेता उद्धव थापालाई अनुशासनको कारबाही गरेको छ ।

राप्रपाको आज बसेको सचिवालय बैठकले थापालाई प्रदेश सांसदबाट पदमुक्त गर्दै पार्टी सदस्यता समेत खारेज गर्ने निर्णय गरेको हो । बाग्मती प्रदेश सरकार गठनका क्रममा नेकपा एमालेलाई समर्थन गरेको आरोपमा थापामाथि कारबाही गरिएको जनाइएको छ ।

थापाले पार्टीको निर्णयविपरीत एमाले नेतृत्वको सरकारलाई समर्थन गरेको भन्दै राप्रपाले यसअघि पनि उनको भूमिकाप्रति असन्तुष्टि जनाउँदै आएको थियो ।

बैठकमा नेता कमल थापाले भने थापामाथि कारबाही गर्ने निर्णयप्रति नोट अफ डिसेन्ट लेखेका छन् । उनी उद्धव थापालाई कारबाही गर्न नहुने पक्षमा उभिएको बताइएको छ ।

कारबाहीको विषयलाई लिएर सचिवालय बैठकमा नेताहरूबीच चर्काचर्कीसमेत भएको बताइएको छ । राप्रपाले बाग्मती प्रदेश सरकार निर्माणका क्रममा पार्टीको निर्णय र निर्देशनविपरीत कुनै पनि दललाई समर्थन नगर्न आफ्ना प्रदेशसभा सदस्यलाई निर्देशन दिएको थियो ।

सोही निर्णयविपरीत एमाले नेतृत्वको सरकारलाई समर्थन गरेको विषयलाई लिएर उद्धव थापामाथि अनुशासनको कारबाही गरिएको हो ।