काठमाडौँ । सत्तारुढ राष्ट्रिय स्वतन्त्र पार्टी (रास्वपा)की सांसद लिमा अधिकारी आचार्यले मानव बेचबिखन तथा ओसारपसारसम्बन्धी संशोधन विधेयकमा प्रयोग गरिएको ‘वेश्यावृत्ति’ शब्द हटाउन माग गरेकी छन्।

प्रतिनिधि सभाको सोमबारको बैठकमा मानव बेचबिखन तथा ओसारपसार (नियन्त्रण) ऐन, २०६४ लाई संशोधन गर्न बनेको विधेयक, २०८३ माथिको छलफलमा सहभागी हुँदै उनले उक्त शब्दको सट्टा ‘यौनजन्य क्रियाकलाप’ राख्न सुझाव दिइन्।

‘विधेयकमा वेश्यावृत्ति भन्ने शब्द राख्नुभएन, यसलाई हटाउनुपर्‍यो। ‘वेश्यावृत्ति’ भन्ने शब्द हटाएर ‘यौनजन्य क्रियाकलाप’ भन्ने शब्द राखौँ,’ उनले भनिन्।

महिला, बालबालिका, लैंगीकक तथा यौनिक अल्पसङ्ख्यक र सामाजिक सुरक्षा मन्त्री सीता बादीले उक्त विधेयक प्रतिनिधि सभामा प्रस्तुत गरेकी हुन्।

सांसद अधिकारीले बेचबिखन प्रभावितका सन्दर्भमा प्रयोग गरिएको ‘पुन:स्थापना’ शब्दको सट्टा ‘पुन:समायोजन’ राख्नु उपयुक्त हुने धारणा पनि व्यक्त गरिन्।

मानव बेचबिखन नियन्त्रणका लागि सीमा क्षेत्रमा निगरानी बढाउनुपर्ने र प्रभावित व्यक्तिको पुन:स्थापनाका लागि स्थापित कोषमा पर्याप्त रकम व्यवस्था गर्नुपर्ने उनको माग छ।

नाबालिकालाई प्रलोभनमा पारेर डिम्ब बिक्री गराउने घटना बढेको उल्लेख गर्दै सांसद अधिकारीले यसतर्फ राज्यका सम्बन्धित निकाय गम्भीर र सचेत बन्नुपर्नेमा जोड दिइन्।