वासिङ्टन । वासिङटन–तेहरानबीचको युद्धविराम सहमति भङ्ग भएपछि बढ्दो क्षेत्रीय तनावबीच इजरायली प्रधानमन्त्री बेन्जामिन नेतन्याहुले इरानलाई कडा चेतावनी दिँदै ‘युद्ध अझै नसकिएको’ जिकिर गरेका छन् । उनले तेल अभिभ सबै सम्भावित परिस्थितिका लागि तयारी गरिरहेको बताए ।

हात्जेरिम एयर बेसमा इजरायली वायुसेनाको तालिम समापन समारोहलाई सम्बोधन गर्दै प्रधानमन्त्री नेतन्याहुले राष्ट्रको वायु क्षमताको प्रभुत्व कायम राख्नु नै देशको राष्ट्रिय सुरक्षा प्रणालीको मुख्य आधार रहेकोमा जोड दिए । उनले तेहरानले उल्लेखनीय धक्का खाएको तरपनि नयाँ रणनीतिक चुनौतीहरू देखा पर्न थालेको सङ्केत गरे ।

इजरायली सञ्चारमाध्यमले प्रधानमन्त्री नेतन्याहुलाई उद्धृत गर्दै भने, “इरानी शासनलाई ठूलो झट्का लागेको छ र हाम्रो नीति स्पष्ट छ, चाहे सम्झौता होस् वा नहोस्, इरानले आणविक हतियार प्राप्त गर्न पाउने छैन । यदि हामीले कदम नचालेको भए इरानले आणविक हतियार प्राप्त गरिसकेको हुन्थ्यो। युद्ध अझै सकिएको छैन र हाम्रोसामु नयाँ चुनौतीहरू देखा पर्दैछन् ।”

अमेरिकी राष्ट्रपति डोनाल्ड ट्रम्पले युद्धविराम ‘समाप्त’ भएको घोषणा गरी दुई देशबीचको सैन्य हमलापछि तेहरानसँगको कूटनीतिक प्रयासलाई ‘समयको बर्बादी’ भनेको एक दिनपछि इजरायली नेताको यो भनाइ आएको हो ।

तेहरानले हर्मुज जलडमरुमध्यमा व्यावसायिक जहाजहरूलाई आक्रमण गरेको र त्यसपछि वासिङटनले ८० भन्दा बढी इरानी लक्ष्यहरूलाई आक्रमण गरी तेहरानको पेट्रोलियम निर्यातमा प्रतिबन्ध लगाएपछि इरानले बहरइन र कुवेतमा रहेका अमेरिकी सैन्य आधारहरूमा जवाफी हमला गरेको थियो।

प्रधानमन्त्री नेतन्याहुको चेतावनीसँगै इजरायली सेनाका प्रमुख लेफ्टिनेन्ट जनरल एयाल जामिरले तेहरानविरुद्धको आक्रमण अझै समाप्त नभएको बताउनुभएको छ तर रक्षा सेना नयाँ रणनीतिक योजनाहरू तयार पारिरहेको उल्लेख गरे । ‘हाम्रो सामु अझै ठूला कारबाहीहरू हुन बाँकी छन्’, उनले भने ।

यसैबीच, इजरायली रक्षा मन्त्री इजरायल काट्जले पनि यदि आवश्यक परेमा इरानविरुद्ध पुनः सैन्य कारबाही गर्न तयार रहेको बताएका छन् । ‘यदि हामीलाई फर्किनु पर्छ भने, हामी अझ ठूलो शक्तिका साथ फर्किनेछौं,“ काट्जले भने । उनले इजरायल आफ्नो हवाई प्रभुत्व कायम राख्न र क्षेत्रीय खतरा निष्क्रिय पार्न अत्यन्त सतर्क रहेको बताए ।

नेतन्याहुले तेल अभिभले ‘यमनदेखि इरानसम्म’ आफ्नो सैन्य कारबाहीको क्षमता प्रमाणित गरेको बताए । उनले भने, ‘तेहरान र उसका छद्म सञ्जालहरू विरुद्धको व्यापक अभियान जारी रहेकोमा जोड दिए । यसका साथै उनले इजरायली रक्षा अधिकारीहरू लेबनानमा ‘आवश्यकता रहँदासम्म’ रहिरहने बताए । एएफपी