मस्को । रुस र युक्रेनले आइतबार १४६ जना युद्धबन्दीलाई फिर्ता पठाएको मस्कोको रक्षा मन्त्रालयले जनाएको छ । मे र जुलाईको बिचमा इस्तानबुलमा रुसी र युक्रेनी प्रतिनिधिमण्डलबीच तीन चरणको वार्ताको एक मात्र ठोस परिणाम भनेको ठूलो परिमाणमा कैदी आदानप्रदान गरिनु हो ।

सन् २०२२ मा रुसको आक्रमण सुरु भएयता टर्कीले रूसको आक्रमणको आलोचना नगरी परोक्षरूपमा युद्धमा समर्थन गरेको आरोप पश्चिमी राष्ट्रहरूले लगाएका छन् । तर टर्कीले युद्धमा आफु तटस्थ रहेको बताउँदै युद्धविराम र शान्ति वार्ता गर्न मध्यस्थताका प्रयासहरू गरिरहेको छ।

रुसी रक्षा मन्त्रालयले टेलिग्राममा भनेको छ, ‘अगस्ट २४ मा १४६ जना रुसी सैनिकलाई किएभको नियन्त्रणमा रहेको क्षेत्रबाट फिर्ता गरिएको छ।’ त्यसको बदलामा युक्रेनी सशस्त्र बलका १४६ जना युद्धबन्दीलाई युक्रेनमा स्थानान्तरण गरिएको छ ।

रूसले भनेको छ, ‘किएभले गैरकानुनी रूपमा हिरासतमा लिएका कुस्र्क क्षेत्रका बासिन्दासहित रुसी महासंघका आठ जना नागरिकलाई पनि आदानप्रदानको एक भागको रूपमा फिर्ता गरिएको छ ।’

युक्रेनी सेनाले गत वर्षको अगष्टमा रुसको कुस्र्क क्षेत्रमा अचानक आक्रमण गरी सयौँ वर्ग किलोमिटर क्षेत्र कब्जा गरेको थियो । रुसले आफ्नो सहयोगी उत्तर कोरियाबाट हजारौँ सैनिक तैनाथ गरपनि अप्रिलसम्म उक्त क्षेत्रमा पूर्ण रुपमा नियन्त्रण कायम गर्न सकेको थिएन । एएफपी