काठमाडौँ । कोरोना भाइरस (कोभिड-१९) को संक्रमणका कारण नेपालमा थप तीन जनाको मृत्यु भएको स्वास्थ्य तथा जनसंख्या मन्त्रालयले पुष्टि गरेको छ । दुई जनाको पाटन अस्पताल र एक जनाको केएमसी अस्पतालमा मृत्यु भएको हो ।
मन्त्रालयले गरेको नियमित पत्रकार सम्मेलनमा प्रवक्ता डा जागेश्वर गौतमले दिएको जानकारीअनुसार काठमाडौँ महानगर १० शंखमुलका ६० वर्षीय पुरुषको मृत्यु भएको हो । मिर्गौला रोगका बिरामीसमेत रहेका उनको फोक्सोमा पानी जमेपछि १६ असारमा पाटन अस्पतालमा भर्ना गरिएकोमा असार २६ गते मृत्यु भएको हो ।
यसैगरी, सिन्धुपाल्चोक, पाँचपोखरी ६ का ४५ वर्षीय पुरुषको पनि असार १८ गते नै सोही अस्पताल भर्ना गरिएको थियो । क्षयरोगको उपचारका लागि अस्पताल भर्ना गरिएकामा२२ गते कोरोना संक्रमण पुष्टि भएको थियो ।
उनको २५ गते पाटन अस्पतालमा मृत्यु भएको छ । यसैगरी, गोकर्णेश्वर ४ का ५४ वर्षीय पुरुषको मिर्गौलामा समस्या देखिएपछि उपचारार्थ केएमसी अस्पताल, सिनामंगलमा असार १९ गते भर्ना गरिएको थियो ।
श्वासप्रश्वासमा समस्या देखिएपछि त्रिवि शिक्षण अस्पताल महाराजगञ्ज लगिए पनि आईसीयूमा बेड खाली नभएपछि केएमसीमा उपचार गरिएको थियो । उनको २१ गते स्वाब संकलन गरिएको थियो । तर, रिपोर्ट नआउँदै २५ गते नै उनको मृत्यु भयो । रिर्पोटमा कोरोना संक्रमण पुष्टि भएको थियो ।
थप तीनसहित नेपालमा कोरोना संक्रमणका कारण मृत्यु हुनेको संख्या ३८ पुगेको छ । स्वास्थ्य तथा जनसंख्या मन्त्रालयका अनुसार शनिबार थप ७० सहित कोरोना संक्रमितको कुल संख्या १६ हजार ७१९ पुगेको छ ।
जसमध्ये ८४४२ जना निको भएर घर फर्किसकेका छन् । हालसम्म ५०.५ प्रतिशत बिरामी डिस्चार्ज भएको मन्त्रालयले जनाएको छ ।
प्रतिक्रिया