काठमाडौँ । नेपालमा पछिल्लो २४ घन्टाभित्र थप १०३९ जनामा कोरोना संक्रमण पुष्टि भएको छ । देशभरका ३९ वटा प्रयोगशालामा गरिएको ९ हजार १६६ जनाको पिसिआर परीक्षणका क्रममा १०३९ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
आइतबार नियमित पत्रकार सम्मेलनमा प्रवक्ता डा जागेश्वर गौतमले दिएको जानकारीअनुसार कोरोना संक्रमितको संख्या ५४ हजार २५९ पुगेको छ । जसमा १५ हजार ११७ जना सक्रिय संक्रमित उपचाररत छन् । पछिल्लो समय कोरोना संक्रमण समुदायस्तरमा फैलिएपछि देशभर ५० भन्दा बढी जिल्लामा निषेधाज्ञा जारी गरिएको छ ।
काठमाडौं उपत्यकामा थप ५९७ जनामा संक्रमित थपिएका छन् । काठमाडौँका ४८३, ललितपुरका ८१ र भक्तपुरका ३३ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । हालसम्म उपत्यकाभित्र संक्रमित हुनेको संख्या ११ हजार ७३६ पुगेको छ । जसमा काठमाडौँमा कुल ९१०३, ललितपुरमा १२१० र भक्तपुरमा ९४० जना रहेका छन् ।
प्रवक्ता डा जागेश्वर गौतमले पछिल्लो २४ घन्टामा कोरोना सङ्क्रमणबाट नौ जनाको मृत्यु भएको जानकारी दिए । यससँगै नेपालमा कोरोना सङ्क्रमणबाट ज्यान गुमाउनेको सङ्ख्या ३४५ पुगेको छ ।
त्यस्तै, आइतबार एकैदिन कोरोना संक्रमण निको भई ११७३ जना डिस्चार्ज भएका छन् । हालसम्म डिस्चार्ज हुनेको संख्या ३८ हजार ८९७ पुगेको छ । जुन कुल संक्रमितको ७१.४५ प्रतिशत हो ।
प्रवक्ता डा गौतमका अनुसार हालसम्म ८ लाख ४० हजार ५२७ जनाको पिसिआर विधिबाट परीक्षण गरिएको छ भने ३ लाख १२ हजार ४०२ जनाको आरडिटी विधिबाट परीक्षण गरिएको छ । उनका अनुसार हाल ६ हजार ५३६ जना क्वारेन्टाइनमा र १५ हजार ११७ जना आइसोलेसनमा रहेका छन् ।
जसमा संस्थागत आइसोलेसन ७ हजार ७३० जना र होम आइसोलेसनमा ५ हजार ३८७ जना रहेका छन् । जसमध्ये २३ जनाको भेन्टिलेटरमा र १६९ जनाको आइसियूमा उपचार भइरहेको छ ।
प्रतिक्रिया