काठमाडौँ । नेपालमा पछिल्लो २४ घन्टाभित्र थप ११७० जनामा कोरोना संक्रमण पुष्टि भएको छ । देशभरका ३९ वटा प्रयोगशालामा गरिएको १० हजार ८७८ जनाको पिसिआर परीक्षणका क्रममा ११७० जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

सोमबार नियमित पत्रकार सम्मेलनमा प्रवक्ता डा जागेश्वर गौतमले दिएको जानकारीअनुसार कोरोना संक्रमितको संख्या ५५ हजार ३२९ पुगेको छ । जसमा १५ हजार ३९३ जना सक्रिय संक्रमित उपचाररत छन् । पछिल्लो समय कोरोना संक्रमण समुदायस्तरमा फैलिएपछि देशभर ५० भन्दा बढी जिल्लामा निषेधाज्ञा जारी गरिएको छ ।

काठमाडौँ उपत्यकामा थप ५१२ जनामा संक्रमित थपिएका छन् । काठमाडौँका ४४०, ललितपुरका ४३ र भक्तपुरका २९ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । हालसम्म उपत्यकाभित्र संक्रमित हुनेको संख्या १२ हजार २४८ पुगेको छ । जसमा काठमाडौँमा कुल ९५४३, ललितपुरमा १२५३ र भक्तपुरमा ९६९ जना रहेका छन् ।

प्रवक्ता डा जागेश्वर गौतमले पछिल्लो २४ घन्टामा कोरोना सङ्क्रमणबाट १५ जनाको मृत्यु भएको जानकारी दिए । यससँगै नेपालमा कोरोना सङ्क्रमणबाट ज्यान गुमाउनेको सङ्ख्या ३६० पुगेको छ ।

त्यस्तै, सोमबार एकैदिन कोरोना संक्रमण निको भई ८७९ जना डिस्चार्ज भएका छन् । हालसम्म डिस्चार्ज हुनेको संख्या ३९ हजार ५७६ पुगेको छ । जुन कुल संक्रमितको ७१।५३ प्रतिशत हो ।

प्रवक्ता डा गौतमका अनुसार हालसम्म ८ लाख ५१ हजार ४०५ जनाको पिसिआर विधिबाट परीक्षण गरिएको छ भने ३ लाख १२ हजार ४०२ जनाको आरडिटी विधिबाट परीक्षण गरिएको छ । उनका अनुसार हाल ६ हजार ८९२ जना क्वारेन्टाइनमा र १५ हजार ३९३ जना आइसोलेसनमा रहेका छन् ।

जसमा संस्थागत आइसोलेसन ८ हजार ११८ जना र होम आइसोलेसनमा ७ हजार २७५ जना रहेका छन् । जसमध्ये २९ जनाको भेन्टिलेटरमा र १७९ जनाको आइसियूमा उपचार भइरहेको छ ।