काठमाडौँ । कोरोना भाइरस (कोभिड–१९) को विश्वव्यापी महामारीको संकटको समयमा काठमाडौँकी हिरा पाण्डे समस्यामा परेका हजारौँ मानिसको पीडामा साथ र सहयोग प्रदान गर्ने एक सामाजिक अभियन्ता हुन् ।
पवित्र उद्देश्यका साथ दिनरात नभनीकन अनेक व्यक्तिहरुसँग सहयोग जुटाउँदै कोरोनाको महामारीबाट समस्यामा परेकाहरुलाई दैनिकरुपमा खाद्य सामग्री उपलब्ध गराउँदै आएकी छन् । अभाव र पीडामा परेका पाँचहजारभन्दा बढी मानिसहरुलाई अहिलेको विषम परिस्थितिमा राहत वितरण गर्दै आएकी छन् ।
उनी चार महिना लामो लकडाउनको अवधिमा मात्र होइन, अहिले पनि दैनिकरुपमा राहत वितरणमा संलग्न छिन् । धार्मिक र मानवीय भावना बोकेर हिँडेकी समाजसेवी पाण्डेले आफूले सकेको सहयोग प्रदान गर्दै आएकी छन् । आफूले जुटाएको सहयोग भगवानको नाम उच्चारण गर्दै भगवानको प्रसादको रुपमा गरिब, दुःखीका लागि अहोरात्र सेवा गर्न तल्लीन रहेकी छन् ।
आफूनो निजी कामको लोभ र मोह छाडेर भगवानले दिएको मानिसको चोलामा मानिसहरुको कल्याणका लागि सहयोग गर्न पाएकोमा उनी निकै खुसी छन् । कोरोना महामारीबाट बच्न मानिसहरु घरमै बसेर ज्यान जोगाइरहेको अवस्थामा उनी भने संकटको घडीमा कोरोनासँग जुध्दै हरेक दिन आफूले सकेको र आफूले जुटाएको सहयोग दुःखी गरिबको लागि उनले बाँड्दै आइरहेकी छन् ।
उनले अझै पनि आफूले चाहेजस्तो सहयोग गर्न नसकेको बताउँछिन् । उनको सामाजिक योगदानको कदर गर्दै गन्तव्य नेपालले आयोजना गरेको एक कार्यक्रममा पूर्वप्रधानमन्त्री डा. बाबुराम भट्टराईले ‘कोरोना हिरो अवार्ड’ प्रदान गरेका थिए ।
सो अवार्डले आफूलाई अझै मानवीय सहयोग र समाजसेवामा लाग्न थप ऊर्जा प्राप्त भएको उनको भनाइ छ । जस्तोसुकै महामारी आए पनि सहयोग गर्न नछाड्ने प्रतिबद्धता पनि सामाजिक अभियन्ता हिरा पाण्डेले गरेकी छन् ।
प्रतिक्रिया