काठमाडौँ । नेपालमा पछिल्लो २४ घन्टामा थप ८२ जनामा कोरोना पुष्टि भएको छ । देशभरका २५ वटा प्रयोगशालामा पछिल्लो २४ घन्टामा ३९१६ जनाको नमुना परीक्षणका क्रममा ८२ जनामा संक्रमण पुष्टि भएको हो ।
स्वास्थ्य तथा जनसंख्या मन्त्रालयले गरेको नियमित पत्रकार सम्मेलनमा प्रवक्ता डा जागेश्वर गौतमले जानकारी दिए । यससँगै कोरोना संक्रमितको संख्या १६ हजार ८०१ पुगेको छ ।
मन्त्रालयका अनुसार महोत्तरी, रौतहट, पाल्पा, अछाम, कैलाली र बाजुरामा ५०० भन्दा बढी संक्रमित छन् । गत चौबिसघन्टामा विभिन्न अस्पतालमा उपचार गराएकामध्ये १४७ जना कोरोनामुक्त भई घर फर्किएका छन् ।
हालसम्म कोरोनामुक्त भई घर फर्किनेको संख्या ८५८९ पुगेको मन्त्रालयले जनाएको छ । जम्मा संक्रमितमध्ये ५१.१ प्रतिशत निको भएका प्रवक्ता गौतमले बताए ।
नेपालमा कोरोना संक्रमणका कारण हालसम्म ३८ जनाको मृत्यु भएको छ । मृत्यु हुनेमा काठमाडौँ महानगरपालिका १० शंखमुलका ६० वर्षीय पुरुष र सिन्धुपाल्चोक, पाँचपोखरी ६ का ४५ वर्षीय पुरुषको पाटन अस्पतालमा र गोकर्णेश्वर ४ का ५४ वर्षीय पुरुषको केएमसी अस्पताल सिनामंगलमा मृत्यु भएको मन्त्रालयले जनाएको छ ।
प्रवक्ता गौतमका अनुसार हालसम्म २ लाख ८३ हजार ५१५ जनाको पिसिआर विधिबाट परीक्षण गरिएको छ भने ३ लाख १२ हजार ४०२ जनाको आरडिटी विधिबाट परीक्षण गरिएको छ ।
उनका अनुसार हाल २३ हजार ७८४ जना क्वारेन्टाइनमा र ८१७४ जना आइसोलेसनमा रहेका छन् ।
हालसम्म काठमाडौँ उपत्यकाभित्र ३४७ कोरोना संक्रमित देखिएका मन्त्रालयले जनाएको छ ।
प्रतिक्रिया