कोलोराडो (अमेरिका) – कोलोराडो राज्यका गभर्नर जेरार्ड पोलिस केही दिन अघि सुटुक्क नेपाल पुगेर फर्किएका छन् । अमेरिका र नेपाल विच लगानी र व्यापार विस्तार गर्ने एजेण्डा लिएर पोलिस नेपाल पुगेका थिए । उनीसंग कोलोराडोका केही कम्पनीका वरिष्ठ अधिकारीहरु पनि सहभागि थिए ।
गभर्नर पोलिसको समुहको भ्रमणको संयोजन हेल्पिगं ह्याण्डका अध्यक्ष नायारण श्रेष्ठले गरेका थिए ।
कोलोराडो नेपाली समुदायको उल्लेख्य वस्ती रहेको राज्य हो । नेपाल घुम्ने जाने पर्यटकमा कोलोराडोका नागरिकको संख्या पनि उल्लेखनिय छ । रक्की माउण्टेन पर्वतमालामा पर्ने कोलोराडो नेपालमा जस्तै डाडां कांडा छन् । यहां हाइकिंग, जाडोमा स्की गर्न पर्यटक आउंछन् ।
नेपालमा गभर्नर पोलिसको भ्रमणको कार्यतालिका काठमाडौ स्थित अमेरिकी दुतावासले नियन्त्रण गरेको थियो । काठमाडौ स्थित अमेरिकी राजदुत र्याण्डी वेरीको गृहराज्य पनि कोलोराडोनै हो । राजदुत वेरीले नै काठमाडौमा गभर्नर पोलिससंग नेपाली पक्षको भेटघाटको व्यवस्था गरेका थिए ।
भ्रमणमा सहभागी श्रेष्ठका अनुसार तीन दिन दुई रात नेपाल बसाईको क्रममा पोलिसले नेपालका उद्यमी व्यवसायीसंग छलफल गरेका थिए । नेपाल उद्योग बाणिज्य महासंघका अध्यक्ष भवानी राणा लगायत थुप्रै उद्यमी व्यवसायीलाई पोलिसको समुहले भेटेको थियो । नेपालमा रहंदा उक्त टोलीले जलस्रोत विज्ञ र प्राविधिकहरुसंग पनि उक्त टोलीले भेटेको थियो ।
पोलिससंग गएको टोलीमा कोलोराडोमा विद्युत आपूर्ति गर्ने एक्सल इनर्जीका निर्देशक, यूनिभर्सिटी अफ कोलोराडोका अनुसन्धानकर्ता लगायतको पनि सहभागीता थियो । नेपालको कर्णालीमा जलस्रोतको लाइसेन्स पाएको एउटा नेपाली समुहसंग पनि त्यसवेला छलफल भएको थियो ।
गभर्नर जेरार्ड पोलिस नेपाल समुदायसंग पनि निकट छन् । चुनावमा नेपाली समुदायले पोलिसलाई सहयोग गरेको थियो । पोलिस गभर्नर हुनु अघि कांग्रेस सदश्य सांसद थिए । डेनभर नजिक बोल्डरका पोलिस कांग्रेस सदश्य हुदां नेपाल ककस समुहका सहसंयोजक थिए । बोल्डर सिटी र काठमाडौ महानगरपालिका विच भागिनी सम्वन्ध छ ।
अमेरिकाले नेपालको जलस्रोत क्षेत्रको विस्तारका लागि ठुलो अनुदान सहयोग गरेको छ । एमसीसी अन्तर्गत हाल अमेरिकाले नेपाललाई करिव ५० अर्ब रुपैंया अनुदान सहयोग दिएको छ । यो सहयोगको मुख्य हिस्सा विद्युत ट्रान्समिशन लाइन विस्तारमा खर्च हुदैं छ ।
पोलिसले अमेरिकामा नेपालीको पक्षमा लविगंका लागि सहयोग गर्दै आएका छन् । यो भ्रमण पछि वासिंटन स्थित नेपाली राजदुत डा अर्जुन कार्कीले पोलिसलाई कोलोराडोमा भेटेका थिए । पोलिसले कोलोराडोमा नेपालको पर्यटन र व्यापार प्रवद्र्धनका लागि एउटा कार्यलय राख्ने प्रयास गरिरहेका छन् ।
हेल्पिगं हेण्डका अध्यक्ष श्रेष्ठले आफ्नो संस्था मार्फत नेपालको संखुवासभामा विभिन्न समाजिक कार्य गर्दै आएका छन् । लामो समय देखि कोलोराडोमा वस्दै आएका श्रेष्ठकै सकृयतामा काठमाडौ र बोल्डर शहर विच सम्वन्ध कायम भएको थियो ।
नेपालको छोटो भ्रमका क्रममा पोलिसले प्रधानमन्त्री लगायत सरकारी अधिकारीहरुसंग पनि भेटघाट गरेनन् । काठमाडौ स्थित दुतावासले डाकेका व्यक्ति र व्यवसायीलाई मात्र उनले भेटेका थिए । नेपाल भ्रमणका क्रममा पोलिस याक एण्ड यती होटलमा वसेका थिए । त्यस पछि भारत पनि भ्रमण गरेका थिए ।
प्रतिक्रिया