बेइजिङ । मृत्युदण्डको दुई दशकपछि एक चिनियाँ युवकलाई त्यहाँको सर्वोच्च अदालतले निर्दोष सावित गरेको छ ।
अदालतले गरेको पूर्व फैसला उल्टयाउँदै नी सुविन नाम गरेका युवकलाई अदालतले निर्दोष ठहर गरेको हो । हेवेई प्रान्तको सिजियाझुयाङमा एक महिलामाथि बलात्कार र हत्या आरोपमा दोषी प्रमाणित भएपछि नीलाई सन् १९९५ मा मृत्युदण्ड दिइएको थियो ।
अदालत कक्षको निकै भावुक माहोलका बीच न्यायाधीशले नीका सम्बन्धमा गरिएको पूर्वफैसलामा आवश्यक प्रमाण संकलन नगरिएको बताए । न्यायाधीशले नी संलग्न भएको भनिएको घटनामा मृत्युको समय, हत्यामा प्रयोग भएको हतियार र मृत्युको कारणबारे गम्भीर आशंकाहरू रहेको उल्लेख गरे ।
‘यो घटनामा सर्वोच्च अदालतले नी सुविनका सम्बन्धमा गरिएको फैसलालाई परिवर्तन गरेको छ र उनी निर्दोष भएको फैसला गरेको छ,’ चिनियाँ सरकारी समाचार समिति सिन्हाले जनाएको छ ।
फैसला सुनेपछि नीकी आमा झाङ अदालतमै रोएकी थिइन् । दुई दशकदेखि आफ्ना छोराको न्यायका लागि लड्दै आएकी उनले भनिन्, ‘म मेरो छोरालाई भन्न चाहन्छु, तिमी असल हौ, निर्दोष हौ ।’
नीलाई मृत्युदण्डको सजाय दिएको १० वर्षपछि सन् २००५ मा सोही अपराधमा अर्का व्यक्ति वाङ सुजिनलाई दोषी ठहर्याइएको थियो । सर्वोच्चले गत जुनमा नीकी आमालाई मुद्दा पुनरावलोकन गर्ने स्वीकृति दिएको थियो ।
झाङले चाँडै छोराको चिहानमा जाने बताइन् । उनले भनिन्, ‘म अब उसलाई गएर भन्नेछु, तिम्रो आमाको प्रयास त्यत्तिकै खेर गएन, तिमीले न्याय पाएका छौं मेरो छोरा !’ -सीएनएन
प्रतिक्रिया